काठमाडौं (हाम्रो खेलकुद) – नेपाली फुटबलका मिडफिल्डर जगजित श्रेष्ठको अस्ट्रेलिया क्लब सनसाइन जर्ज क्रस एफसीले भिक्टोरिया प्रिमियर लिगमा शनिबार अर्को बराबरी खेलेको छ । सनसाइन जर्ज र मेरिल्यान्ड एफसीले गोलरहित बराबरी खेलेका थिए ।

गत साता सिजनको पहिलो खेलमा पनि सनसाइज जर्जले २–२ को बराबरी खेलेको थियो । पहिलो खेलमा जस्तै जगजितले शनिबार पनि दोस्रो हाफमा मात्र मौका पाएका थिए । जगजितले आफुले अझै सोचे अनुरुपको प्रदर्शन गर्न नसकेको हाम्रो खेलकुदलाई बताएका छन् ।
पहिलो खेलमा २–० ले पछि परेको खेल उल्टाउँदै सनसाइन जर्जले खेल बराबरीमा पुर्याएको थियो ।एक बर्षमा जगजितले दोस्रो अस्ट्रेलियन क्लबमा आबद्ध भएका छन् । उनी केही साताअघि अघि सनसाइनमा आबद्ध भएका थिए ।
यसै बर्षको सुरुआत तिर अस्ट्रेलिया पुगेका जगजितले साउनमा भिक्टोरिया स्टेटको बी डिभिजन टोली ह्युम युनाइटेड एफसीबाट तीन महिना खेलेका थिए । त्यति बेला उनले १ हजार ५ सय अमेरिकी डलर मासिक पारिश्रमिक लिन्थे । गैर अस्ट्रेलियन २ खेलाडी राख्न पाउने प्रावधान अनुसार जर्जले उनलाई क्लबमा समेटेको हो । भिक्टोरियाको प्रिमियर लिगमा २० क्लब छन् ।
नेपालले गत बर्ष दुई महत्वपूर्ण उपलब्धी हासिल गर्दा जगगित पनि टोलीका सदस्य थिए । फागुनमा भारतमा १२ औं दक्षिण एसियाली खेलकुदमा यू २३ ले स्वर्ण पदक जित्नुअघि राष्ट्रिय टोलीले माघमा बंगलादेशमा बंगबन्धु गोल्डकप जित्दा जगजित टोलीमा थिए ।