काठमाडौं (हाम्रो खेलकुद) – चौथौं अन्तर स्कुल चेस प्रतियोगिताको उपाधि आयोजक पायोनियर पब्लिक स्कुल कपनले जितेको छ । पायोनियरले १७ अंकका साथ उपाधि जितेको हो । १४ अंकका साथ अन्नपूर्ण उच्च मावि दोश्रो र १३ अंकका साथ ग्रीनल्यान्ड स्कुल तेश्रो भयो ।

स्वीस लिग ५ राउण्डको खेलमा ब्बाइज सिनियरतर्फ पायोनियरका विराज पुडासैनी साढे ४ अंक जोड्दै विजयी भए । सोही स्कुलका सौरभ पोख्रेल दोस्रा र कंचनजंगाका डल्लुका प्रमित अमात्य तेस्रा भए । ब्बाइज जुनियरतर्फ अन्नपूर्णका प्रवेश लामा साढे ४ अंकका साथ विजयी भए । दिपज्योति स्कुल गोंगबुका जनिल मिया दोस्रा र पायोनियरका मन्दिप राई तेस्रा भए ।

सिनियर गल्र्सतर्फ पायोनियरकी आभा पुडासैनी विजयी भइन् । सोही स्कुलकी अनिषा न्यौपाने दोस्रा र त्रियोग उच्चमाविकी तेजस्वीनि तामाङ्ग तृतीय भइन । गल्र्स जुनियरमा आयोजक स्कुल सुप्रिया बुढाथोकी विजयी भइन् । ग्रीनल्यान्ड स्कुल धापासीकी सम्बृद्धि पाण्डे दोस्रा र अन्नपूर्णकी नेहा दास बानियाँ तेस्रा भइन् ।

दुई दिने प्रतियोगिताअन्तर्गत सबै विधाका विजेताले १ हजार ५ सय , दोस्रो हुनेले १ हजार तेस्रो हुने खेलाडीले ५ सय रुपैयाँ प्राप्त गरे । शनिबार एक दिने खुला फिडे रेटिङ्ग ब्लिट्ज प्रतियोगितापछि शुक्रबारका विजेतालाई पनि पुरस्कृत गरिने आयोजक स्कुलका प्रिन्सिपल राजन श्रेष्ठले जानकारी दिए ।