सिड्नी (हाम्रो खेलकुद) – ढोरपाटन क्लब अस्ट्रेलियाको आयोजनामा पाँचौं संस्करणको महिला र पुरुष ढोरपाटन रनिङ कप २०२४ अर्काे महिना आयोजना हुने भएको छ ।

एकदिने महिला र पुरुष ढोरपाटन रनिङ कप २०२४ असोज २० गते आइतबार (अक्टोवर ६) अवर्न बास्केटबल सेन्टर लिडकममा हुनेछ ।

रनिङ कपमा पुरुषतर्फ १२ र महिलामा ५ टोलीको सहभागिता रहने क्लबका अध्यक्ष हिक्मत घर्ती मगरले जानकारी गराए । सहभागी टोलीलाई दुई समूहमा विभाजन गरी नकआउटका आधारमा प्रतिस्पर्भा गराइनेछ । खेल तालिका प्रतियोगिता शुरु हुनुभन्दा एक साता अघि सार्वजनिक गरिने आयोजकले जनाएको छ ।

पुरुषतर्फको विजेताले २ हजार ७ सय अष्ट्रेलियन डलर, रनिङ ट्रफी, मेडल र प्रमाणपत्र प्राप्त गर्नेछ । दोस्रो हुनेले १ हजार ७ सय अष्ट्रेलियन डलर, ट्रफी, मेडल र प्रमाणपत्र प्राप्त गर्नेछ ।

यस्तै महिलातर्फको विजेताले १ हजार २ सय ५० अष्ट्रेलियन डलर, रनिङ ट्रफी, मेडल र प्रमाणपत्र तथा दोस्रो हुनेले ७ सय अष्ट्रेलियन डलर, ट्रफी, मेडल र प्रमाणपत्र प्राप्त गर्नेछ ।

महिला र पुरुष दुवैतर्फको सर्वाेत्कृष्ट खेलाडीले समान १ सय अस्ट्रेलियन डलर, ट्रफी र प्रमाणपत्र प्राप्त गर्नेछन् । यस्तै पुरुषतर्फको उत्कृष्ट स्पाइकर, ब्लकर, सेटर, सर्भर र लिवेरोले ट्रफी र प्रमाणपत्र प्राप्त गर्ने आयोजकले जनाएको छ ।

नेपाल भलिबल संघ अस्ट्रेलियाको सहकार्यमा हुन लागेको ढोरपाटन रनिङ कपलाई केओआई र एएलडी कर्पाेरेटले मुख्य प्रायोजन गरेको छ ।

ग्लोबल कन्सल्ट, फोर नेसन्स इन्टरनेसनल पायोनिएर एजुकेशन एण्ड भिजा सर्भिसेस र सिर्जन मल्लको परिवार प्लाटिनम प्रायोजक रहेका छन् । एसएनभ क्लिनि« सर्भिसेस, काठमडौ मम हाउस, मिलन कार्की, जमघट नेपाली रेष्टुरेन्ट, गोल्ड स्पोन्सर रहेका छन् । एभरेस्ट ग्लोबल, नमस्ते ज्वेलर्स, डिवाई बट्चर सप र नेपमार्ट सिल्भर स्पोन्सर रहेका छन् ।