सिड्नी (हाम्रो खेलकुद) – नेपाली पुरुष राष्ट्रिय भलिबल टोलीका सदस्य विशाल बहादुर बिकसम्मिलित प्रो भलिबल एकेडेमीले अष्ट्रेलियाको सिड्नी भलिबल लिग (एसभिएल) मा दोस्रो स्थान हासिल गरेको छ ।

सिड्नीस्थित ओलम्पिक पार्कमा आइतवार भएको फाइनलमा एसर्स भलिबलसँग ३–२ को सेटमा पराजित भएसँगै विशालको टोली प्रो भलिबल एकेडेमीले दोस्रो स्थानमा चित्त बुझाएको हो ।

पहिलो सेट २५–२३ ले जितेको प्रो भलिबलले दोस्रो र तेस्रो सेट २३–२५ र २२–२५ ले गुमाउन पुगेको थियो । चौथो सेटमा एक समय १६–२२ ले पछि परेको प्रोले पूनरागमन गर्दै २६–२४ ले जित निकाल्दा खेल पाँचौ सेटमा लम्बियो । प्रोले पाँचौ सेट ११–१५ ले गुमाउन पुग्यो ।

गत मेबाट सुरु भएको एसभिएलमा प्रो भलिबल एकेडेमीले १० खेल जित्दै क्वाटरफाइनलमा स्थान बनाएको थियो । न्यु साउथ वेल्स (एनएसडब्लु) राज्यको मुख्य इन्डोर भलिबल प्रतियोगिताको सेमिफाइनलमा जित निकालेपछि प्रो भलिबल एकेडेमी डिभिजन वानबाट बढुवा हुँदै पुरुष रिजर्भ लिगमा पुगेको छ ।

प्रोले लिग चरणमा एक र फाइनलमा हार बेहोर्यो । पुरुष रिजर्भ लिगपछि पुरुष प्रिमियर लिग हुनेछ । यस प्रो भलिबल एकेडेमीको सिनियर पुरुष टोली, सिनियस महिला टोली, डिभिजन ४, ३, २, १ टोलीसँगै यू–१४, यू–१६, यू–१८ टोली रहेका छन् ।

विशाल अष्ट्रेलियाको एसभिएल खेल्ने पहिलो नेपाली खेलाडी हुन् । उनी दक्षिण एसियाली मुलुक भन्दा बाहिरका राष्ट्रबाट खेल्ने दोस्रो नेपाली पुरुष खेलाडी हुन् । यसअघि दुर्ज कुमार राईले जर्मनीमा व्यवसायिक लिग खेलेका थिए ।

दुर्ज कुमारले सन् १९८२ को एसियन गेम्सपछि तत्कालिन पश्चिम जर्मनीमा गएर युरोपियन लिग खेलेका थिए । तत्कालिन पश्चिम जर्मनीका ओलम्पिक प्रशिक्षक माइकल ग्रेगरीले झन्डै दुई महिना नेपालमा प्रशिक्षण दिएपछि उनी छनोट भएर लिग खेल्न जर्मनी पुगेका थिए ।

महिलातर्फ भने कोपिला उप्रेती, निमा श्रेष्ठ, मन्जु गुरुङ, अरुणा शाही, प्रतिभा माली, सरस्वती चौधरी, उषा भण्डारी र कामना विष्टले माल्दिभ्सको लिग तथा च्याम्पियनसिप खेलिसकेका छन् । दक्षिण एसियाली मुलुकका क्लबबाट नेपाली पुरुष खेलाडी इम राना, कुलबहादुर थापा, मानबहादुर श्रेष्ठ, हरि हजुर थापालगायतले खेलिसकेका छन् ।

यस्तै सरस्वती चौधरीले जापानमा तथा प्रतिभा र अरुणाले नेदरल्यान्ड्समा प्रशिक्षणको मौका पाएका थिए । विशालले घरेलु भलिबलमा विभागीय नेपाल पुलिस क्लबबाट खेल्ने गरेका थिए ।