सिड्नी (हाम्रो खेलकुद) – अष्ट्रेलियामै बसोबास गरिरहेका नेपाली राष्ट्रिय टोलीका खेलाडीले मेलवर्नमा आयोजना भएको ५०औं राष्ट्रिय कराते च्याम्पियनसिपमा विभिन्न विधामा ७ पदक जितेका छन् ।

न्यु साउथ वेल्स (एनएसडब्लु) राज्य अष्ट्रेलियाबाट प्रतिनिधित्व गरेका नेपाली खेलाडीले ३ रजत पदक र ४ कास्य पदक जितेका हुन् ।

दिवस श्रेष्ठ ८४ केजीमाथिको तौल समूह र टिम कुमुतेमा रजत पदक जित्न सफल भए । टिम कुमुतेमा रजत जितेका नविन रसाइलीले ६७ केजीमुनि तौल‌ समूहमा कास्य हात पारे । नविन १३ औं सागका स्वर्ण पदक विजेता हुन्।

मलिका थापाले ५५ केजीमुनि, मनिष थापा र विजय श्रेष्ठले समान ६० केजीमुनि तौल समूहमा कास्य प्राप्त गरेको खेलाडी नविन रसाइलीले जानकारी गराए ।

एनएसडब्लु राज्य अष्ट्रेलियाबाट सहभागी भएकामध्ये राजकुमार रसाइली र सुजन श्रेष्ठ पदक विहीन बने राजकुमारले ७५ केजीमुनि र सुजनले ८४ केजीमुनि प्रतिस्पर्धा गरेका थिए ।

दिवस १३औं सागका रजत विजेता तथा राजकुमार टिम कुमुतेका कास्य विजेता खेलाडी हुन् ।

च्याम्पियनसिप भिक्टोरिया राज्यको मेलवर्नस्थित जिलोङमा २ देखि ४ अगस्टसम्म सञ्चालन भएको थियो । पछिल्लो समय अष्ट्रेलियामा रहेका नेपाली खेलाडीहरु विभिन्न च्याम्पियनसिपमा सहभागी हुदै आइरहेको छ ।