काठमाडौं (हाम्रो खेलकुद) – इरानले काभा महिला भलिबल नेसन्स लिगमा श्रीलंकामाथि रोमाञ्चक जित निकालेको छ ।

इरानले श्रीलंकामाथि ३–२ को सेटमा पराजित गर्दै लिगमा पहिलो जित दर्ता गरेको हो ।

सुरुवाती दुई सेट जितेर सहज जिततर्फ अघि बढेको इरानले त्यसपछि दुई सेट गुमाँउदा पाँचौं सेटमा जित निकाल्न सफल भएको हो ।

त्रिपुरेश्वरस्थित राष्ट्रिय खेलकुद परिषदको कभर्ड हलमा शुक्रबार भएको पहिलो खेलको पहिलो सेट इरानले २५–२० ले आफ्नो पक्षमा पार्यो । त्यसपछि दोस्रो सेट पनि सहजै २५–१२ ले जित्दा इरान सहज जिततर्फ अग्रसर बन्यो ।

तर, तेस्रो र चौथो सेटमा श्रीलंकाले सुधारिएको खेल पस्कदै २५–२२ र २५–१३ को जित निकाल्दा खेल पाँचौ सेटमा लम्बियो । पाँचौ सेटमा एक समय श्रीलंका दुई अंकले अघि रहेपनि त्यसलाई जोगाउन नसक्दा इरानले १५–११ को सेटमा जित निकाल्यो ।

यस जितसँगै इरानले दुई खेलबाट २ अंक बटुलेको छ। लगातार दोस्रो हार बेहोरेपनि इरानबाट अंक खाेसेकाे श्रीलंकाले १ अंक जाेडेकाे छ । यसअघि इरान पहिलो खेलमा भारतसँग ३–१ को सेटमा तथा श्रीलंकाले नेपालसँग ३–० को सोझो सेटमा हार बेहोरेको थियो । आज नै भारत र माल्दिभ्सबीच प्रतिस्पर्धा हुँदैछ । भारत र नेपालको समान ३ अंक छ ।

च्याम्पियनसिपमा नेपालसहित भारत, श्रीलंका, माल्दिभ्स र इरानको सहभागीता रहेको छ । शीर्ष चार टोलीले सेमिफाइनल खेल्नेछन् ।