काठमाडौं (हाम्रो खेलकुद) – उपाधि विजेता नेपाल एपिएफ क्लबकी कप्तान तथा अल-राउण्डर सिता राना मगर ललितपुर मेयर्स टि-२० च्याम्पियनसिप २०२४ को उत्कृष्ट खेलाडी घोषित भएकी छन् । एपिएफले चौथो पटक उपाधि प्रतियोगितामा सिता अल-राउण्ड प्रदर्शनका साथ उत्कृष्ट खेलाडी घोषित भएकी हुन् ।

सिताले प्रतियोगितामा ५ खेलमा १४२ रन प्रहार गर्नुका साथै ४ विकेट समेत लिन सफल रहिन् । उनले २ अर्धशतक प्रहार गर्दा फाइनलमा समेत ७४ रन जोडेको थिइन् ।

यस्तै सुदुरपश्चिम प्रदेशकी सम्झना खड्काले उत्कृष्ट ब्याटरको उपाधि जितिन् । उनले ५ खेलमा २ अर्धशतक सहित १५६ रन बनाएको थिइन् ।

ललितपुर मेयर्स-११ की कृतिका मरासिनी ४ खेलमा ११ विकेट लिँदै उत्कृष्ट बलर घोषित हुन सफल रहिन् ।

प्रतियोगिताको उपाधि एपिएफले फाइनलमा सुदूरपश्चिम प्रदेशलाई २ रनले पराजित गर्दै जितेको थियो ।

यसअघिको तीनै संस्करण पनि एपिएफले नै जितेको थियो । एपिएफ प्रतियोगिता इतिहासमा २० खेल मध्य २० खेल नै जित्न सफल रहेको छ । पहिलो संस्करणमा कोशी प्रदेश फाइनलमा पराजित भएको थियो भने पछिल्लो दुई संस्करणमा सुदुरपश्चिमले नै फाइनलमा हार बेहोरेको थियो ।

एपिएफले राउण्ड रोबिन चरणमा सबै चार खेलमै जित दर्ता गरेको थियो । सुदुरपश्चिमले भने एपिएफ विरुद्ध हार बेहोरेपानी अन्य तीन खेल जितेको थियो ।

यी दुई टोलीबाहेक प्रतियोगितामा आयोजक ललितपुर मेयर्स-११, बागमती प्रदेश र कोशी प्रदेशको सहभागिता रहेको थियो ।