सुनिल गाउँले, सिमरा

विभागीय टोली त्रिभुवन आर्मी क्लब विरुद्ध संघर्षपूर्ण जित निकाल्दै मच्छिन्द्र क्लब जगदम्बा स्टिल १४ औं जीतपुरसिमरा गोल्डकपको सेमिफाइनलमा प्रवेश गरेको छ ।

सिमरा रंगशालामा मंगलबार राति भएको प्रतिष्पर्धात्मक खेलमा मच्छिन्द्रले आर्मी १–० लाई हराउँदै अन्तिम चारको यात्रा तय गरेको हो । ६९ औं मिनटमा सौरभ लिम्बुले गरेको मच्छिन्द्रला लागि निर्णायक बनेको थियो । खेलको ६३ औं मिनटमा अभिषेक गुरुङको ठाउँमा मैदान प्रवेश गरेका सौरभ ले आर्मीका गोलरक्षक विकेश कुथुको गल्तीको फाइदा उठाउँदै गोल गरेका थिए ।

सेन्टर लाईनबाट बल अघि बढाएका विमल घर्तीमगरको पासमा सौरभले पेनाल्टी बाहिरैबाट बललाई पोष्टको दिशा दिएका थिए । मच्छिन्द्रको प्रयासलाई रोक्न पेनाल्टी बक्स बाहिरै पुगेका आर्मीका गोलरक्षक कुथुलाई बिट गर्दै सौरभले सुन्दर गोल गरेका थिए ।

८८ औं मिनटमा मच्छिन्द्रले अग्रता दोब्बर पार्ने मौका गुमायो । आर्मीका डिफेण्डर विमल पाण्डेले मच्छिन्द्रका विमललाई पेनाल्टी बक्समा लडाएपछि एन्फा रेफ्री उमेश विंडारीले मच्छिन्द्रलाई पेनाल्टी दिएका थिए । मच्छिन्द्रका देवेन्द्र तामाङको पेनाल्टी प्रहार क्रसबार माथिबाट गयो ।

राष्ट्रिय टोलीका चर्चित अनुहारहरु सिमरा रङ्गशालामा उत्रँदा रङ्गशालामा उपस्थित ५ हजार बढी दर्शक उत्साहित देखिन्थे ।

प्लेयर न अफ दि म्याच बनेका मच्छिन्द्रका मनिष डाँगीले १० हजार रुपैयाँसहित ट्रफि प्राप्त गरे । बारागढी गाउँपालिकाका अध्यक्ष अशोक जयसवाल र शुभारम्भ कलेजका निर्देशक अनिल चौधरीले प्लेयर अफ दि म्याचको पुरस्कार प्रदान गरेका थिए ।

प्रतियोगितामस बुधबार आयोजक नवजनजागृति युवा क्लब सिमरा र नेपाल पुलिस क्लबकाबीच खेल हुनेछ ।