काठमाडौं (हाम्रो खेलकुद) – नेपाली फुटबलको तेस्रो श्रेणीको लिग सहिद स्मारक सि डिभिजन लिग आजदेखि सुरु हुँदै छ । सातदोबाटो स्थित एन्फा कम्प्लेक्समा हुने प्रतियोगिताको उद्दघाटन खेलमा आज आरसी ३२ फुटबल एकेडेमी र खलीबारी युथ क्लब भिड्ने छन् ।

खेल दिनको ३ बजेदेखि सुरु हुनेछ । गत संस्करणमा आरसी ३२ तेस्रो रहँदै बि डिभिजन लिगमा बढुवा हुनुबाट २ अंकले चुकेको थियो । खलीबारी भने गत सिजन आठौ रहन पुगेको थियो ।

पटक पटक मिति सर्दै आएको यस लिग सुरुवातमा हेटौंडामा खेलाईने भनिएतापनि अन्ततः एन्फा कम्प्लेक्समा नै खेलाईने भएको छ । बुधबार पत्रकार सम्मेलन गरी प्रतियोगिताको तयारी पुरा भएको जानकारी एन्फाले गराएको थियो ।

गत सिजन झापा फुटबल क्लब र प्लानिङ ब्वाइज युनाइटेड पहिलो र दोस्रो रहँदै बि डिभिजनमा बढुवा भएका थिए । यस पटक उपत्यका बाहिरका पाँच क्लबले सि डिभिजनमा सहभागिता जनाउदैछन् ।

सिंगल राउण्ड रोबिन ढाँचामा खेलाईने लिग विजेताले १० लाख रुपैयाँ पुरस्कार पाउने छ । दोस्रो हुने टोलीले ७ र तेस्रो हुने टोलीले ५ लाख पुरस्कार पाउने छ । यस्तै उत्कृष्ट खेलाडीको ५०,००० रुपैयाँ पाउने छन् भने उत्कृष्ट गोलकिपर र सर्वाधिक गोलकर्ताले जनही ३५,००० रुपैयाँ पाउने छन् ।

खेलहरूको प्रत्यक्ष प्रसारण प्राइम एचडी टीवी र क्यानडा नेपालको युट्युबमा हुनेछ । टिकट मल्यदर साधारण तर्फ रु १०० र भिआईपी तर्फ रु २०० निर्धारण गरिएको छ ।