काठमाडौं, असोज ७

चेस खेलाडी भएकै कारण दुई जनाले रुसमा छ बर्षे अध्ययन छात्रबृति पाएका छन् ।

पछिल्लो केही बर्षयता राष्ट्रिय तथा अन्तर्राष्ट्रिय चेसमा उच्च प्रदर्शन गरेपछि नेपाल बुद्धिचाल संघको सिफारिसमा रुपेश जैसवाल र विवेक थिङले छात्रबृति पाएका हुन् । दुवै खेलाडी बिहीबार रुस प्रस्थान गरेका छन् । उनीहरुले अब रुसको पिल्स फ्रेन्डसिप युर्निभसिटी अफ मस्कोमा अध्ययन गर्नेछन् ।

केहि महिनाअघि नेपाल भ्रमणका क्रममा विश्व बुद्धिचाल महासंघ (फिडे) का अध्यक्ष किर्सान इल्युमझिनोभले दुई नेपाली खेलाडीलाई व्यक्तिगत प्रयासमा छात्रबृतिको व्यवस्था मिलाइदिने वाचा गरेका थिए । सोही वाचा अनुरुप नेपाली खेलाडीले अवसर पाएका हुन् । विभिन्न उमेर समूहमा च्याम्पियन रहिसकेका रुपेश राष्ट्रिय टिम च्याम्पियन गोल्डेन गेट क्लबका सदस्य हुन् । यसै बर्ष उनले सिंगापुरमा आयोजना भएको एसियन एज ग्रुप चेस प्रतियोगिताको ¥यापिड र ब्लिट्जमा पदक जितेका थिए । त्यो नेपालले चेसमा जितेको अहिले सम्मको ठूलो पदक हो । उनी २२ सय रेटिङ पार गर्ने दोस्रो नेपाली हुन् ।

विवेक यु–१९ च्याम्पियन खेलाडी हुन् । दुवैले ग्रान्ड मास्टर (जिएम) बन्ने लक्ष्य रहेको सुनाए । फिडे मास्टर रुपेशले भने ‘चेसबाट देशलाई चिनाउन चाहन्छु । एसियाली पदक जितेपछि देशको लागि केही गरे भन्ने लाग्छ । जिएम बन्ने लक्ष्य छ । रुसको अध्ययनले त्यसमा मद्दत गर्न सक्छ ।’ ‘इन्टरसनेल मास्टर (आइएम) हुँदै जिएम पुग्न चाहन्छु,’ विकेकले भने,‘विश्व च्याम्पियनसिपमा पदक जित्न पक्कै सहज छैन । एसियाली स्तरको प्रतियोगितामा पदक जित्ने प्रसास गर्छु ।’

बुद्धिचाल संघका अध्यक्ष राजेशहरी जोशीले दुई खेलाडीले छ बर्षे रुस बसाइमा पहिलो बर्ष भाषा र त्यसपछि अध्ययनमा बिताउनु पर्ने जानकारी दिए । उनका अनुसार रुसमा हुने सबै खाले प्रतियोगितामा रुपेश र विवेकले भाग लिन पाउनेछन् । जोशीले हरेक बर्ष दुई नेपाली खेलाडीले पूर्ण छात्रबृति पाउने बताए ।