काठमाडौं (हाम्रो खेलकुद) – पर्यटकीय नगरी कास्कीकाे रमणीय गाँउ माछापुच्छ्रे गाउँपालिका ७ धम्पुस मिलन टोलमा यसै महिनाको अन्त्यदेखि पुरुष र महिला भलिबलसँगै प्रौढ भलिबल प्रतियोगिता आयोजना हुने भएको छ ।

माछापुच्छ्रे गाउँपालिका ७ धम्पुसको संयोजन तथा मिलन युवा क्लबको आयोजनामा प्रतियोगिता फागन ३० देखि चैत ३ गतेसम्म आयोजना हुने भएको हो ।

पुरुषतर्फ कास्की जिल्ला अन्तर पालिका वडा स्तरीय पुरुष भलिबल, क्लब स्तरीय महिला भलिबल र प्रौढ भलिबल हुनेछ । पुरुषतर्फको विजेताले १ लाख रुपैयाँ, ट्रफी, मेडल र प्रमाणपत्र प्राप्त गर्नेछ ।

दोस्रो हुनेले ६० हजार र सान्त्वना हुनेले समान १० हजार प्रदान गरिने आयोजकले जनाएको छ । महिलातर्फको विजेताले ४० हजार रुपैयाँ, ट्रफी, मेडल र प्रमाणपत्र प्राप्त गर्नेछ । दोस्रो हुनेले २५ हजार प्राीत गर्नेछ ।

पुरुषतर्फ विधागततर्फ सर्वाेत्कृष्ट खेलाडी, स्पाइकर, ब्लकर, सर्भर, सेटर, डिफेन्डर र प्रशिक्षकलाई तथा महिलामा सर्वाेत्कृष्ट खेलाडी, स्पाइकर, सेटर, सर्भर, डिफेन्डर र प्रशिक्षक छनोट गरिनेछ । प्रौढको विजेताले खसी र उपविजेताले बोका जित्नेछ ।

प्रतियोगितामा सहभागिताको लागि फागुन २८ सम्म दर्ता समय तोकिएको छ । सोही दिन नै टाइसिट निकालिने आयोजकले जनाएको छ । पुरुषतर्फ सहभागिताको लागि ५ हजार ५ सय र महिलामा ३ हजार रुपैयाँ दर्ता शुल्का तोकिएको छ ।

यसबाहेक धम्पुस महोत्सवमा सामुहिक महिला नृत्य प्रतियोगिता, रस्साकस्सी प्रतियोगिता र छेलो प्रतियोगिता पनि हुनेछ । नृत्यको विजेताले १५ हजार, दोस्रोले १० हजार र तेस्रोले ५ हजार रुपैयाँ प्राप्त गर्नेछ ।

विजेताले १५ र उपविजेताले १० हजार रुपैयाँ पाउनेछ । छेलोको विजेताले ५ हजार र दोस्रोले ३ हजार रुपैयाँ प्राप्त गर्नेछ ।