काठमाडौं (हाम्रो खेलकुद) – नेपाल युथ स्पोर्टस क्लब (एनवाइएससी) जापानको आयोजनामा प्रथम एनवाइएससी कप पुरुष भलिबल प्रतियोगिता आयोजना हुने भएको छ ।

क्लबका अध्यक्ष बसन्त थापाले एक दिने प्रतियोगिता मार्च १ तारिखमा टोकियोस्थित सिन्जुकुमा रहेको सिन्जुकु कस्मिक स्पोर्ट्स सेन्टरमा हुने जानकारी गराए । उनका अनुसार प्रतियोगितामा नेपाली समुदायका कम्तीमा १२ टोलीका सहभागिता रहनेछ ।

प्रतियोगितामा सहभागिताको लागि ४० हजार येन दर्ता शुल्क तोकिएको छ । विजेताले २ लाख ५५ हजार ५ सय ५५ येन नगदसहित कप, प्रमाणपत्र र मेडल प्राप्त गर्नेछ ।

दोस्रो हुनेले १ लाख ५५ हजार ५ सय ५५ येन नगदसहित ट्रफी, मेडल र प्रमाणपत्र हात पार्नेछ । सेमिफाइनलमा पराजित हुने टोलीलाई समान ५५ हजार ५ सय ५५ येनसहित प्रमाणपत्र प्रदान गरिने दीपक केसीले जानकारी गराए । यस्तै ७ विधाका ७ जनालाई ट्रफी र प्रमाणपत्र तथा अनुशाषित टोलीलाई पनि ट्रफीले सम्मान गरिने क्लबले जनाएको छ ।

‘खेलाडी मान होइन सम्मान हो, खेलकुद शान होइन हाम्रो पहिचान हो’ भन्ने मुल भावका साथ सन् २०१८ मा स्थापना भएको यस क्लबले सुरुवातदेखि नै जापानमा हुने भलिबल प्रतियोगितामा सहभागिता जनाइरहेको र यसपल्ट आँफैले प्रतियोगिता गर्न लागेको हो ।

अध्यक्ष थापाले प्रतियोगिता आयोजना गर्नुको लक्ष्य नेपाली भुमिमा रहेर भलिबल खेलिरहेका भलिबल खेलाडीहरुलाई खेल मैदानमा हुने दुर्घटनापश्चात उपचार र दीर्घ रोगको उपचार गराईरहेका भलिबल खेलाडीहरूलाई उपचारमा सहयोग गर्ने रहेको बताए ।