काठमाडौं (हाम्रो खेलकुद) – अल्ट्रा दौडमा पहिचान बनाइसकेकी नेपाली धाविका मिरा राईले एडभेन्चर अफ द इयर अवार्ड जितेकी छिन् । टेलीभिजन च्यानल नेसनल ज्योग्राफिकले हरेक बर्ष दिने अवार्डको लागि मनोनयनमा परेका अन्य ९ जनालाई पछि पार्दै उनले अवार्ड जितेको ज्योग्राफिकको वेभसाइटमा उल्लेख छ ।

अवार्डको मनोनयन नेसनल ज्योग्राफिकले कात्र्तिकमा सार्वजनिक गरेको थियो । मनोनयनमा अन्वेषण, साहसिक खेल, संरक्षण तथा मानवीय क्षेत्रमा उत्कृष्ट काम गर्ने व्यक्तिहरूको नाम छनोट गर्छ । मनोनयन परेका लागि नेसनल ज्योग्राफिकको वेबसाइटमार्फत भोटिङको व्यवस्था गरिएको थियो । सर्वाधिक भोट प्राप्त गर्ने उक्त अवार्डको विजेता बन्ने प्रावधान छ । २०१६ को नोभेम्बर ३ देखि सुरु भएको भोटिङ डिसेम्बर १६ सम्म चलेको थियो । गत बर्ष फ्रान्समा म्याराथन डु मोन्ट ब्लान्स नामक ८० किलोमिटर दौडमा उपाधि जितेपछि उनी चर्चामा आएकी थिइन् । उनले त्यो दौड १२ घन्टा ३२ मिनेट १२ सेकेन्डमा दौड पूरा गरेकी थिइन् ।

भोजपुरमा जन्मिएकी २९ बर्षे मिरा तत्कालिन नेकपा माओवादीकी लडाकु थिइन् । सेना समायोजनमा आयोग्य ठहरिएकी उनीले अल्ट्रा दौड सुरु गरेको केही महिनामै सफलता प्राप्त गरेकी थिइन् । घुडाँको शल्यक्रियापछि उनले पछिल्लो समय कुनै प्रतियोगितामा भाग लिएकी छैनन् । मीरासँगै केभ ड्राइभर क्रिजिस्तोफ स्टारवान्स्की, कायकर स्मिथ ली, माउन्टेनर कोलिन हाले, ओसियन एडभोकेट शानन स्वीट्जर स्वानसन, प्याराग्लाइडर एन्टोनी जिरार्ड, पार्क प्रोटेस्टर पिटर म्याकब्राइड र केभिन फेडार्को, वाइल्डरनेस डिफेण्डर क्रिष्टिन म्याकडिभिट तोम्प्कीन र सेलेस्टियल सर्कुमनेभिगेटर होकुले र उनको टोलीमा परेका थिए ।