महेन्द्रनगर (हाम्रो खेलकुद) – विभागीय नेपाल एपिएफ क्लब तेस्रो संस्करणको मुख्यमन्त्री कप पुरुष राष्ट्रिय भलिबल प्रतियोगिताको च्याम्पियन बनेको छ ।

कञ्चनपुरको महेन्द्रनगरमा शनिबार भएको फाइनलमा गण्डकी प्रदेशको पुरुष भलिबल टोलीमाथि ३–१ को सेटमा जित हात पार्दै एपिएफ च्याम्पियन बन्न सफल भएको हो ।

सुरुवाती सेट २१–२५ ले गुमाएपनि त्यसपछि एपिएफले सबै तीन सेट आफ्नो पक्षमा पार्दै उपाधि जित्न सफल भयो । पहिलो सेट गुमाएको एपिएफले त्यसपछिको तीन सेट क्रमशः २५–१६, ३०–२८ र २५–२१ ले जित्न सफल भयो । यसअघि समूह चरणमा पनि एपिएफले गण्डकीलाई ३–० को सोझो सेटमा पराजित गरेको थियो ।

वर्ष २०८० मा एपिएफको यो तेस्रो उपाधि हो । यसअघि एपिएफले काठमाडौंमा भएको प्रथम पोष्ट बहादुर कप र हेटौंडामा भएको केशल स्मृति खुल्ला पुरुष भलिबलमा च्याम्पियन बनेको थियो । यता गण्डकी भने चौथो उपाधि जित्नबाट वञ्चित रह्यो । गण्डकीले मुख्यमन्त्री प्रदेशस्तरीय, लामाचौर कप र विरजङ स्मृतिको उपाधि जितेको थियो ।

यसअघि सेमिफाइनलमा एपिएफले त्रिभुवन आर्मी क्लब तथा गण्डकीले नेपाल पुलिस क्लबलाई समान ३–२ को सेटमा पराजित गर्दै फाइनलमा भेट पक्का गरेका थिए ।

उपाधिसँगै एपिएफले ४ लाख रुपैयाँ, ट्रफी, मेडल र प्रमाणपत्र प्राप्त गरेको छ । दोस्रो भएको गण्डकीले २ लाख रुपैयाँ, ट्रफी, मेडल र प्रमाणपत्र प्राप्त गरेको छ ।

तेस्रो भएको पुलिसले १ लाख नगदसहित ट्रफी, मेडल र प्रमाणपत्र पाएको छ । चौथो भएको आर्मीले ५० हजार रुपैयाँ पाएको छ । पुलिसले आर्मीलाई ३–१ को सेटमा पराजित गर्दै तेस्रो स्थान हासिल गरेको थियो ।

सुदूरपश्चिम खेलकुद परिषद्को आयोजना एवं कञ्चनपुर जिल्ला भलिबल संघको व्यवस्थापनमा भएको प्रतियोगितामा सात प्रदेशसँगै तीन विभाग एपिएफ, पुलिस र आर्मी गरी १० टोलीले लिग कम नकआउटको आधारमा प्रतिस्पर्धा गरेका थिए ।

एपिएफका विजय सर्वाेत्कृष्ट