सुर्खेत हाम्रो खेलकुद) – विभागीय डर्वीमा नेपाल पुलिस क्लबलाई पराजित गर्दै साविक विजेता नेपाल एपिएफ क्लब ३४औं राष्ट्रिय भलिबल प्रतियोगिताको सेमिफाइनलमा प्रवेश गरेको छ ।

लगातार तीन जित निकाल्दै एपिएफ समूह ‘ए’ मा एक खेल बाँकी छँदै अन्तिम चारमा स्थान पक्का गरेको हो । अब एपिएफले मंगलबार बागमती प्रदेशलाई पराजित गरेमा समूह विजेता बन्नेछ । पुलिसले पनि मंगलबार काेशी प्रदेशलाई पराजित गरे समूह उप विजेताकाे रुपमा सेमिफाइनलमा पुग्नेछ ।

कर्णाली प्रदेशको सुर्खेतस्थित विरेन्द्रनगरमा रहेको खुल्लामञ्चको कोर्टमा सोमबार भएको खेलमा एपिएफले पुलिसलाई ३–१ को सेटमा पराजित गरेको हो । पहिलो सेटमा एपिएफले २५–१७ को सहज जित निकाल्यो । १७–२० को स्थितिमा रहँदा एपिएफले लगातार ५ अंक बटुल्दै जित हात पार्न सफल भयो ।

दोस्रो सेटमा एपिएफले सुरुवातमा सानदार प्रदर्शन गर्दा एपिएफ निरिह देखिन पुग्यो । एक समय एपिएफले १२–२ को आरामदायी अग्रता लिएको थियो । पुलिसले पूनरागमन प्रयास गरेपनि एपिएफले २५–१५ को सहज जित निकाल्यो । दोस्रो सेटमा पुलिसले केही खेलाडी परिवर्तन गर्दा खेलमा तालमेल देखिएन ।

रोमाञ्चक र विवादित बनेको तेस्रो सेट भने २५–२२ ले जित्दै पुलिसले खेललाई कायमै राख्यो । प्रतिस्पर्धात्मक बनेको सेटमा पुलिस १८–१६ ले अघि रहँदा रेफ्रीको निर्णयमा पुलिसले असन्तुष्टि जनाउँदा खेल केही बेर रोकिन पुग्यो । त्यसपछि पनि खेल विवादित बनिरह्यो ।

पुलिस २३–२२ ले अघि रहँदा रेफ्रीको निर्णयमा एपिएफले असन्तुष्टि जनाउँदा खेल केही बेर रोकिन पुग्यो । लगातार विवाद गरिरहेपछि रेफ्रीले एपिएफलाई सुरुवातमा पहेलो कार्ड र त्यसपछि पनि विवाद गर्न नछाडेपछि रेफ्रीले एपिएफलाई रातो कार्ड देखाउनु परेपछि पुलिसले अर्काे अंक पाएकाे थियो ।

प्रतिस्पर्धात्मक बनेको चौथो सेटमा भने एपिएफले अन्तिम समयतिर अग्रता लिदै २५–२० को जित निकाल्न सफल भयो । समूह ‘ए’ मा अपराजित रहेको एपिएफले ३ खेलबाट ९ अंक जोडेको छ । पहिलो हार बेहोरेको पुलिसको ३ खेलबट ६ अंक छ । लुम्बिनीकाे पनि ६ अंक रहँदा काेशीकाे ३ तथा बाग्मती अंकविहीन छ ।