हेटौंडा (हाम्रो खेलकुद) – नेपाल एपिएफ क्लबकी ओपन स्पाइकर निरुता ठगुन्ना केशवलाल स्मृति राष्ट्रिय महिला भलिबल प्रतियोगिताको सर्वाेत्कृष्ट खेलाडी घोषित भएका छन् ।

एपिएफलाई अपराजित रहेर च्याम्पियन बनाउन निरुताले उच्च प्रदर्शन गरेकी थिइन् । निरुता हङकङमा भएको दुई छुट्टै भलिबल प्रतियोगितामा पनि सर्वाेत्कृष्ट खेलाडी चुनिएकी थिइन् ।

सर्वाेत्कृष्ट बनेसँगै निरुताले १५ हजार रुपैयाँसँगै मायाको चिनो हात पारेको छ । न्यू डायमण्ड युथ स्पोर्टस् क्लबकी जेनिशा विश्वकर्मा उत्कृष्ट स्पाइकर, डायमण्डकै प्रगति नाथ सेटर, सलिना श्रेष्ठ लिवेरो र सुमित्रा रेग्मी उत्कृष्ट ब्लकर घोषित भए ।एपिएफकी सरस्वती चौधरी उत्कृष्ट सर्भर तथा एपिएफकै विजय केसी उत्कृष्ट प्रशिक्षक चुनिए ।

सोमबार भएको फाइनलमा चन्द्रागिरी नगरपालिका न्यू डायमण्ड युथ स्पोर्टस् क्लबलाई ३–१ सेटले हराउँदै एपिएफले च्याम्पियन बनेको हो । एपिएफले न्यु डायमण्डलाई १९–२५, २५–२०, २५–१७ र २५–२३ को सेटमा हरायो ।

उपाधिसहित एपिएफले २ लाख रुपैयाँ, कप, मेडल र प्रमाणपत्र हात पारेको छ । दोस्रो भएको न्यु डायमण्डले १ लाख रुपैयाँमा चित्त बुझाएको छ ।

विजयी टोली तथा उत्कृष्ट खेलाडीलाई हेटौंडा उपमहानगरपालिकाकी प्रमुख मीना कुमारी लामाले पुरस्कृत गरिन् । प्रतियोगितामा ३ विभागीय टोली त्रिभुवन आर्मी, नेपाल पुलिस क्लब, एपिएफ, न्यु डायमण्ड र घरेलु टोली छहारी युवा क्लब गरि ५ टोलीको सहभागिता थियो ।

खेलकुद तथा व्यापार महोत्सवमा भलिबल प्रतियोगिता आयोजना भएको हो । मकवानपुर जिल्ला भलिबल संघ र केशवलाल श्रेष्ठ स्मृति केन्द्रीय प्रतिष्ठानको संयुक्त आयोजना तथा हेटौँडा उपमहानगरपालिकाको सहयोगमा राष्ट्रिय महिला भलिबल प्रतियोगिता भएको हो ।

प्रतियोगिताको उत्कृष्टहरु
सर्वाेत्कृष्ट – निरुता ठगुन्ना (एपिएफ)
स्पाइकर – जेनिशा विश्वकर्मा (न्यु डायमण्ड)
सेटर – प्रगति नाथ (न्यु डायमण्ड)
ब्लकर – सुमित्रा रेग्मी (न्यु डायमण्ड)
सर्भर – सरस्वती चौधरी (एपिएफ)
लिवेरो – सलिना श्रेष्ठ (न्यु डायमण्ड)
प्रशिक्षक – विजय केसी (एपिएफ)