काठमाडौं (हाम्रो खेलकुद) – आयोजक प्रदेशी हातेमालो सहकारी संस्था युएई (दुबई) का ओपन स्पाइकर रवि केसी नेपाली अन्तर संस्थास्तरीय युएईंव्यापी दोस्रो प्रदेशी हातेमालो भलिबल कपको सर्वाेत्कृष्ट खेलाडी घाेषित भएका छन् ।

गण्डकी प्रदेशका महत्वपूर्ण स्पाइकर रहेका रविले प्रदेशीलाई लगातार दोस्रोपल्ट च्याम्पियन बनाउन सानदार प्रदर्शन गरेका थिए । उनी एक दिनअघि मात्रै हङकङबाट युएईं पुगेका थिए । हङकङमा दुई प्रतियोगिता खेल्दा त्यहा पनि रवि दुवै प्रतियोगितामा सर्वाेत्कृष्ट खेलाडी चुनिएका थिए ।

सर्वाेत्कृष्ट बनेका रविले २ सय दिरामसँगै ट्रफी र मेडल प्राप्त गरेको छ । प्रदेशीकै सुजन चोखाल उत्कृष्ट सेटर, इन्द्र बिक क्विकर, राजन दर्लामी मगर लिवेरो र मनु खड्का उत्कृष्ट प्रशिक्षक चुनिए ।

तनहुँका मिलन चन्द उत्कृष्ट स्पाइकर, पाल्पाका रेशम छन्त्याल उत्कृष्ट ब्लकर, पाल्पाकै हेमन्त मल्ल उत्कृष्ट सर्भर चुनिए । विधागतका उत्कृष्टले १ सय दिरामसँगै ट्रफी र मेडल प्राप्त गरेको छ ।

युएईंको दुवईंस्थित जद्दाफमा रहेको अल वालि इन्डोर स्टेडियममा आइतबार राति भएको फाइनलमा तनहुँ सेवा समाजलाई २–० को सोझो सेटमा पराजित गर्दै प्रदेशी लगातार दोस्रो संस्करणमा पनि च्याम्पियन बन्न सफल भयो ।

प्रदेशीले नेपाली घरेलु भलिबलमा चर्चित रवि केसी, सुजन चोखाल, राजन दर्लामी मगर, बिष्णु बस्नेत, इन्द्र बिक जीवन सुनारलाई टोलीमा समेटेको थियो ।

तनहुँले मिलन चन्द ठकुरी, प्रेम कुमाल र विशाल ठकुरीलाई टोलीमा समेट्दा तेस्रो भएको पाल्पा सेवा समाजले सन्जु विक्रम शाह, रेशम छन्त्याल र हेमन्त बहादुर मल्ललाई टोलीमा समेटेको थियो ।

एक दिने प्रतियोगितामा युएईंमा रहेका नेपाली समुदायका विभिन्न २० टोलीको सहभागिता रहेको थियो ।

प्रतियोगिताको सर्वाेत्कृष्ट
सर्वाेत्कृष्ट – रवि केसी (प्रदेशी हातेमालो)
स्पाइकर – मिलन चन्द ठकुरी (तनहुँ सेवा समाज)
सेटर – सुजन चोखाल (प्रदेशी हातेमालो)
क्विकर – इन्द्र विक (प्रदेशी हातेमालो)
ब्लकर – रेशम छन्त्याल (पाल्पा सेवा समाज)
सर्भर – हेमन्त मल्ल (पाल्पा सेवा समाज)
लिवेरो – राजन दर्लामी मगर (प्रदेशी हातेमालो)
प्रशिक्षक – मनु खड्का (प्रदेशी हातेमालो)