काठमाडौं (हाम्रो खेलकुद) – आयोजक प्रदेशी हातेमालो सहकारी संस्था युएई (दुबई) ले नेपाली अन्तर संस्थास्तरीय युएईंव्यापी दोस्रो प्रदेशी हातेमालो भलिबल कपको उपाधि जितेको छ ।

युएईंको दुवईंस्थित जद्दाफमा रहेको अल वालि इन्डोर स्टेडियममा आइतबार राति भएको फाइनलमा तनहुँ सेवा समाजलाई २–० को सोझो सेटमा पराजित गर्दै लगातार दोस्रो संस्करणमा च्याम्पियन बन्न सफल भएको हो ।

घरेलु भलिबलका चर्चित रवि केसी, सुजन चोखाल, राजन दर्लामी मगर, बिष्णु बस्नेत, इन्द्र बिक जीवन सुनारसम्मिलित प्रदेशीले मिलन चन्द ठकुरी, प्रेम कुमाल र विशाल ठकुरीसम्मिलित तनहुँमाथि २५–१६ र २५–१८ को सोझो सेटमा जित निकाल्न सफल भयो ।

सन्जु विक्रम शाह, रेशम छन्त्याल र हेमन्त बहादुर मल्लसम्मिलित पाल्पा सेवा समाजले आयोजक ‘बी’ लाई २–० को सोझो सेटमा पराजित गर्दै तेस्रो स्थान हासिल गरेको छ ।

विजेता प्रदेशीले ८ हजार ८ सय ४८ दिरामसँगै कप, मेडल र प्रमाणपत्र प्राप्त गरेको छ । दोस्रो भएको तनहुँले ५ हजार ५ सय ५५ दिराम, कप, मेडल र प्रमाणपत्र प्राप्त हात पारेको छ ।

तेस्रो भएको पाल्पाले ३ हजार ३ सय ३३ दिराम तथा चौथो भएको आयोजक ‘बी’ ले २ हजार २ सय २२ दिराम, कप, मेडल र प्रमाण पत्र प्राप्त गरेको आयोजकले जनाएको छ ।

व्यक्तिगत विधामा पनि च्याम्पियन प्रदेशीले नै वर्चश्व जमाएको छ । प्रदेशीका रवि केसी प्रतियोगिताको सर्वाेत्कृष्ट खेलाडी घोषित भए । उनले २ सय दिरामसँगै ट्रफी र मेडल प्राप्त गरेको छ । प्रदेशीकै सुजन चोखाल उत्कृष्ट सेटर, इन्द्र बिक क्विकर, राजन दर्लामी मगर लिवेरो र मनु खड्का उत्कृष्ट प्रशिक्षक चुनिए ।

तनहुँका मिलन चन्द उत्कृष्ट स्पाइकर, पाल्पाका रेशम छन्त्याल उत्कृष्ट ब्लकर, पाल्पाकै हेमन्त मल्ल उत्कृष्ट सर्भर चुनिए । विधागतका उत्कृष्टले १ सय दिरामसँगै ट्रफी र मेडल प्राप्त गरेको छ ।

सोही अवसरमा एनआरएनए एसीसी युएईं र नेपाली समज युएईंबीच भएको मैत्रीपूर्ण खेलमा एनआरएनए एसीसी युएईं विजयी भएको छ । एक दिने प्रतियोगितामा युएईंमा रहेका नेपाली समुदायका विभिन्न २० टोलीको सहभागिता रहेको थियो ।