काठमाडौं (हाम्रो खेलकुद) – प्रदेशी हातेमालो सहकारी संस्था युएईको आयोजनामा अंग्रेजी नयाँ वर्ष २०२४ को अवसरमा हुन लागेको नेपाली अन्तर संस्था स्तरीय युएईं व्यापी दोस्रो प्रदेशी हातेमालो भलिबल कपको तयारी पूरा भएको छ ।

प्रदेशी हातेमालो सहकारी संस्था युएईले यही शनिबार ३१ डिसेम्वरमा हुने भलिबल कपको सम्पूर्ण तयारी पूरा भएको संस्थाका अध्यक्ष मनु सुनारले जानकारी गराए ।

युएईंको दुवईंस्थित जद्दाफमा रहेको अल वासल इन्डोर स्टेडियममा हुने एक दिने प्रतियोगितामा युएईंमा रहेका नेपाली समुदायका विभिन्न २० टोलीको सहभागिता रहेको छ । सहभागी टोलीलाई दुई समूहमा विभाजन गरी खेल तालिका पनि सार्वजनिक गरिसकेको छ । खेलहरु नकआउटकाे आधारमा हुनेछ ।

यसै प्रतियोगितामा सहभागी हुन नेपाली घरेलु भलिबलमा चर्चामा रहेका खेलाडीहरु त्यसतर्फ प्रस्थान गरिसकेका छन् । सन्जु बिक्रम शाह र रेशम छन्त्यालसँगै रवि केसी, सुजन चोखाल, राजन दर्लामी मगर, बिष्णु बस्नेत, इन्द्र बिक, जीवन सुनार र हेमन्त बहादुर मल्ल त्यसतर्फ प्रस्थान गरेका छन् ।

सन्जु, रेशम र हेमन्तले पाल्पा सेवा समाजबाट खेल्नेछन् । रवि, राजन, सुजन, बिष्णु, इन्द्र र जीवनले आयोजक प्रदेशी हातेमालोबाट खेल्नेछन् ।

प्रतियोगिताको विजेताले ८ हजार ८ सय ४८ दिरामसँगै कप, मेडल र प्रमाणपत्र प्राप्त गर्नेछ । । दोस्रो हुनेले ५ हजार ५ सय ५५ दिराम, कप, मेडल र प्रमाणपत्र हात पार्नेछ ।

तेस्रो हुने टोलीले ३ हजार ३ सय ३३ दिरामसँगै कप, मेडल र प्रमाणपत्र तथा सान्त्वना हुने टोलीलाई २ हजार २ सय २२ दिराम, कप, मेडल र प्रमाण पत्र प्रदान गरिने अध्यक्ष मनुले बताए । गत वर्ष आयाेजक नै च्याम्पियन बनेकाे थियाे । त्यसबेला आयाेजकले बिशाल बिकलाई टाेलीमा समेटेकाे थियाे ।

प्रतियोगिताको सर्वाेत्कृष्ट खेलाडीले २ सय दिरामसँगै ट्रफी र मेडल प्राप्त गर्नेछ । विधागतका उत्कृष्टले १ सय दिरामसँगै ट्रफी र मेडल प्रदान गरिने आयोजकले जनाएको छ ।