काठमाडौं (हाम्रो खेलकुद) –विपना ब्लोन र अरहान्तकेशर सिंह एनएसआरए एनिभरसरी कप स्क्वास प्रतियोगितामा च्याम्पियन बनेका छन् ।

सातदोबाटोस्थित नेपाल स्क्वास र्याकेट संघका भवनमा शनिबार भएको प्रतियोगिताको पुरुष एकल फाइनलमा नेपालका नम्बर १ अरहान्तले अमिर ब्लोनलाई ४ सेटमा ६–११, ११–७, ११–४, ११–८ ले पराजित गरे ।

अरहान्तको खेलजीवनको यो १४ औं एकल उपाधि हो । महिला एकल फाइनलमा विपना ब्लोनले कृष्णा थापालाई ४ सेटमै ११–८, ८–११, ११–६ र १३–११ ले निराश पारिन्।

यसैगरी यु१९ गल्र्समा साक्षी सुनुवार फाइनलमा रेनेसा महर्जनलाई सीधा सेथटमा ११–२, ११–१ र ११–२ ले हराउँदै च्याम्पियन बनिन्। यु१९ ब्वाइजको फाइनलमा विकास तुम्सिङ मगरले पासाङ ब्लोनलाई चार सेटमा ११–७, १२–१४, ११–६ र ११–४ ले पराजित गरे ।

त्यस्तै मास्टर्स ५० प्लसमा छविलाल पाइजा पुन प्रज्वल प्रधानलाई ३–१ सेटमा र प्लेट च्याम्पियन्सीपमा पासाङ ब्लोन दिव्यराज वज्राचार्यलाई ३–० ले हराए ।

नेपाल स्क्वास र्योेकट्स संघको स्थपना ३५ वर्ष पुगेकोे अवसरमा आयोजित एनएसआरए एनिभरसरी कप स्क्वासमा ६ विधामा प्रतिस्पर्धा को थियो ।

प्रतियोगितामा विजयी खेलाडीहरुलाई एक्स स्टेपले पुरस्कार प्रायोजन गरेको थियो ।

भावना र राजेन्द्रको सन्न्यास
दुई अनुभवी खेलाडी भावना सुनुवार र राजेन्द्र शाक्यले अन्तर्राष्ट्रिय स्क्वास प्रतियोगिताबाट सन्न्यास लिएका छन् ।

नेपाल स्क्वास र्याकेट संघले प्रतियोगिताको समापनमा भावना र राजेन्द्र लाई सम्मानपत्र प्रदान गर्यो। दुबैले घरेलु स्क्वास प्रतियोगितालाई भने निरन्तरता दिने बताइएको छ।

दुई दशकदेखि स्क्वासमा आवद्ध भावना एक दशकभन्दा बढी घरेलु महिला स्क्वासमा दबदबा बनाउने खेलाडी हुन् । चार पटक दक्षिण एसियाली खेलकुद (साग)मा सहभागी भएकी भावनाले कोलेम्बोमा भएको दसौं, १२ औँ साग र १३ औं सागमा महिला टिम इभेन्टमा कास्य पदक जितेकी थिइन्।

यसैगरी एसियाली खेलकुदमा नेपालको प्रतिनिधित्व गरेका राजेन्द्र नेपाल स्क्वास एन्ड र्याकेट्स संघका केन्द्रीय सदस्य पनि हुन् ।