काठमाडौं (हाम्रो खेलकुद) – नेपाली उदियमान खेलाडी प्रिन्स दाहाल योनेक्स वेन्डिगो इन्टरनेशनल च्यालेन्ज २०२३ को क्वाटरफाइनलमा पराजित भएकाे छ।

अष्ट्रेलियास्थित मेलवर्नमा शुक्रबार न्यूजिल्याण्डका इडवार्ड लोउसँग २–० ले पराजित हुँदै प्रिन्स क्वाटरफाइनलमा रोकिएको हो । प्रिन्सले लोउसँग १३–२१ र ११–२१ को हार भोगे ।

त्यसअपघ क्वाटरफाइनलसम्मको यात्रामा विश्व जुनियरको शीर्षस्थानमा रहिसकेका प्रिन्सले राउन्ड ६४ मा अष्ट्रेलियाका याउजु जौलाई २१–१० र २१–६, राउण्ड अफ ३२ मा अष्ट्रेलियाकै श्रेय धान्दलाई २१–११ र २१–१६ ले तथा प्रिक्वाटरफाइनलमा चाईनिज ताईपेईका पाङ फोङ पुईलाई २१–१८, १२–२१, २१–१४ ले पराजित गरेका थिए ।

पुरुष एकलतर्फकै प्रि क्वाटरफाइनलमा प्रफुल महर्जन जापानका शोता ओमोतोसँग ९–२१ र १२–२१ ले पराजित भए । त्यसअघि प्रफुलले अष्ट्रेलियाका ओमकार निलमलाई २१–१० र २१–१० ले तथा अष्ट्रेलियाकै केथ मार्क एडिशनलाई २०–२२, २१–१५ र २१–१५ ले पराजित गरेका थिए ।

महिला युगलतर्फ वाई पाएर सिँधै क्वाटरफाईनल पुगेका नङ्शलदेवी तामाङ्ग र अनुमाया राईको जोडी क्वाटरफाईनलमा अष्ट्रेलियाकी प्रिस्का कुस्तीआदी र नोजोमी सिमिजुको जोडी संग ७–२१ र १४–२१ ले पराजित भइन् ।

पुरुष युगलतर्फ प्रिन्स र बिष्णु कटुवालको जोडी प्रिक्वाटरफाइलनमा अष्ट्रेलियाका लुकास डिफोल्की र अन्दिका रामादियान्श्यासँग ८–२१ र १७–२१ ले पराजित भए । त्यसअघि यो जोडीले राउण्ड अफ ३२ मा अष्ट्रेलियाका हुईदोङ्ग ताङ्ग र जिउल झिलाई १०–२१, २२–२० र २१–१९ ले पराजित गरेका थिए ।

पुरुष एकलमा बिष्णु कटुवाल अष्ट्रेलियाका रियो अगुष्टिनोसँग ९–२१ र ९–२१ ले, अनुमाया राई अष्ट्रेलियाकी भिक्टोरिया छोनादीसँग १६–२१ र १६–२१ र नङ्शल अष्ट्रेलियाकी टिफानी होसँग ७–२१ र ८–२१ ले पराजित भए ।