पोखरा (हाम्रो खेलकुद) – गण्डकी प्रदेश र विभागीय नेपाल पुलिस क्लब पोखरामा जारी लामाचौर कप भलिबल प्रतियोगिताअन्तर्गत पुरुषतर्फको फाइनलमा प्रवेश गरेका छन् ।

लिग चरणको अन्तिम खेलमा पुलिसमाथि ३–२ को सानदार पूनरागमन जित निकाल्दै गण्डकीले फाइनलमा स्थान पक्का गरेको हो । हारका बावजुत पनि पुलिस पिन फाइनलमा पुग्न सफल भएको छ ।

यि दुई टोली गत वर्ष पनि फाइनलमा पुगेको थियो । लगातारको वर्षाका कारण खेल हुन नसकेपछि पुरस्कार राशि बाँडेर प्रदान गरिएको थियो ।

इन्द्र राज्य लक्ष्मी माविको भलिबल कोर्टमा सोमबार भएको खेलको पहिलो र दोस्रो सेट गण्डकीले १५–२५ र २३–२५ ले गुमाएको थियो । त्यसपछिको तीनै सेट गण्डकीले आफ्नो पक्षमा पार्दै सानदार जित दर्ता गर्न सफल भयो ।

तेस्रो सेट २५–२२ र चौथो सेट २५–१८ ले सहजै आफ्नो पक्षमा पार्दै गण्डकी खेलमा फर्कियो । निर्णायक तथा पाँचौं सेटमा पनि गण्डकीले एकपक्षीय प्रदर्शन गर्दै १५–१० को जित निकाल्दै फाइनलमा पुग्न सफल भयो ।

यस जितसँगै गण्डकीले लिग चरणको चार खेलबाट ९ अंक बटुल्यो । समान चार खेलबाटै पुलिसले पनि ९ अंक नै जोड्यो । गण्डकीको जितसँगै एपिएफ र मणि मुकुन्द भलिबल क्लबको फाइनल पुग्ने सम्भावना सकिएको छ ।

सोमबार नै भएको अर्काे खेलमा एपिएफले मणि मुकुन्दलाई ३–१ को सेटमा पराजित गरेको छ । एपिएफले मणि मुकुन्दमाथि १७–२५, २५–२१, २५–२३ र ३४–३२ को जित निकालेको छ ।

फाइनल आज नै हुनेछ । मणि मुकुन्दले नखेल्ने भएपछि एपिएफ तेस्रो भएकाे छ। गल्कोट अंक विहीन हुँदै बाहिरिसकेको छ ।

नवआदर्श सामुदायिक विकास समाज (नाकोड्स) आयोजनामा शुक्रबारदेखि सुरु भएको भलिबल प्रतियोगितामा महिलातर्फ ४ र पुरुषतर्फ ५ टिमको सहभागिता रहेको छ ।

महिला र पुरुषतर्फको विजेताले समान १ लाख ५० हजार, ट्रफी, मेडल र प्रमाणपत्र प्रदान गरिने छ । उपविजेताले १ लाख र तेस्रो हुनेले ५० हजार रुपैयाँसँगै ट्रफी, मेडल र प्रमाणपत्र प्राप्त गर्नेछ ।