काठमाडौं (हाम्रो खेलकुद) – प्रयागराज सिंह सुवाल स्मृति अन्तर वडा फुटसल प्रतियोगिताको सम्पूर्ण तयारी पूरा भएको आयोजक काठमाडौं महानगरपालिका वडा नं २३ ले जानकारी दिएको छ ।

लैनचौर फुटसल मैदानमा मंगलबार सुरु हुने प्रतियोगितामा काठमाडौं महानगरपालिका केन्द्रसहित ३० वडाको सहभागिता रहने सोमबार आयोजित पत्रकार सम्मेलनमा जानकारी दिएको छ । पहिलो खेल आयोजक टोली र काठमाडौं महानगरपालिकाबीच हुनेछ ।

वडा नं २३ का अध्यक्ष मचाराजा महर्जनले फुटसलको व्यवसायिक प्रवद्र्धनमा योगदान गर्न र यसको माध्यमबाट खेलप्रति आम नागरिक र युवा वर्गलाई प्रेरित गराउन वडा स्तरबाटै यो प्रतियोगितको आयोजना गर्न लागिएको बताए । उनका अनुसार प्रतियोगितामा ३ सय भन्दा बढी युवा प्रतिस्पर्धा उत्रनेछन् ।

नकआउटको आधारमा हुने प्रतियोगिताको विजेता टोलीले उपाधिसहित २ लाख , दोस्रो हुने टोलीले १ लाख रुपैयाँ प्राप्त गर्नेछ । सर्वोत्कृष्ट खेलाडी, गोकिपर र सर्वाधिक गोलकताएले समान १० हजार रुपैयाँ पाउनेछन् ।

वडा सदस्य गोलपाल नापितको संयोजकत्वमा राजेश मास्के, हरिओम श्रेष्ठ, प्रज्वल शाक्य, विशाल श्रेष्ठ र रामबहादुर रम्बा रजक रहेको ६ सदस्यीय मूल समिति गठन गरिएको छ । प्रतियोगिताको उद्घाटन काठमाडौं महागरपालिकाका प्रमुख बालेन्द्र शाहले गर्ने आयोजकले जनाएको छ ।