पोखरा (हाम्रो खेलकुद) – नवआदर्श सामुदायिक विकास समाज (नाकोड्स) को आयोजनामा यसै साता सुरु हुने २५ औं लामाचौर तीज महोत्सवको मुख्य आकर्षणको रुपमा लामाचौर कप महिला तथा पुरष भलिबल प्रतियोगिता हुने भएको छ ।

संस्थाको २७ औं वार्षिकोत्सवमा हुने प्रतियोगिता ३० देखि असोज १ सम्म लामाचौरको इन्द्रराज्यलक्ष्मी माविको मैदानमा हुनेछ ।आइतबार आयोजित पत्रकार सम्मेलनमा संस्थाका अध्यक्ष स्वागतसिंह भण्डारीले संस्कृतिको जगेर्नासँगै खेलकुदको विकास गर्ने उद्देश्यका साथ महोत्सव आयोजना गर्न लागिएको बताए ।

१० औं संस्करणको लामाचौर कपमा भलिबलमा महिलातर्फ ४ र पुरुषतर्फ ५ टोलीको सहभागिता रहने अध्यक्ष भण्डारीले बताए । महिलातर्फ विभागीय टोली एपिएफ क्लब, नेपाल पुलिस क्लब, न्यु डायमण्ड युथ स्पोर्टस् क्लब र न्यु एभरेष्ट भलिबल क्लब बुटवलले प्रतिस्पर्धा गर्नेछन् ।

पुरुषतर्फ मणिमुकुन्द भलिबल क्लब बुटवल, एपिएफ, पुलिस, गलकोट स्पोर्टस् क्लब बागलुङ र गण्डकी प्रदेशको सहभागिता रहनेछ । पुरुष भलिबल गत वर्षदेखि सुरु भएको हो । महिला तथा पुरुष दुवैतर्फको विजेता टोलीले १ लाख ५० हजार, दोस्रा हुने टोलीले १ लाख र तेस्रो टोली ५० हजार रुपैयाँ प्राप्त गर्नेछन् । सर्वोत्कृष्ट खेलाडी एवं विधागत उत्कृष्ट खेलाडी पनि पुरस्कृत हुनेछ ।