काठमाडौं (हाम्रो खेलकुद) – दक्षिण एशियाली खेलकुद (साग) की चार स्वर्णधारी गौरिका सिंहले २०औं संस्करणको वल्र्ड एक्वाटिक च्याम्पियनसिप २०२३ मा दोस्रो राष्ट्रिय कीर्तिमान कायम गरेकी छिन् ।

जापानको फुकुओकामा जारी २०औं संस्करणको वल्र्ड एक्वाटिक च्याम्पियनसिपमा यसअघि १ सय मिटर ब्याकस्ट्रोकमा नयाँ राष्ट्रिय कीर्तिमान बनाएकी गौरिकाले बुधबार ५० मिटर ब्याकस्ट्रोकमा नयाँ राष्ट्रिय कीर्तिमान बनाउन सफल भएकी हुन् ।

उनले सन् २०१६ मा भारतको गुहावटीमा भएको १२औं दक्षिण एसियाली खेलकुद (साग) मा राखेको ३१.८७ सेकेन्डको समयलाई सुधार गर्दै ३१.४४ सेकेन्ड .सहित नयाँ राष्ट्रिय किर्तिमान कायम गरेकी हुन् ।

ओलम्पिकको छनौट प्रतियोगिता समेत रहेको च्याम्पियनसिपको बुधबार नै पुरुषतर्फको १०० मिटर फ्रिस्टायलमा एलेक्जेन्डर शाहले पनि आफ्नो समयमा सामान्य सुधार गर्दै नयाँ किर्तिमान कायम गरेका छन् ।

एलेक्सले पुरानो समय ५२.९६ सेकेन्डको समयमा सामान्य सुधार गर्दै ५२.९४ समयका साथ नयाँ रेकर्ड राखेका हुन् । एलेक्सले गत असारमा सम्पन्न ११औं एनएसए कप च्याम्पियनसिपमा ५२.९६ सेकेन्ड समयको किर्तिमान राखेका थिए ।

यसअघि मंगलबार डुवाना लामाले २०० मिटर फ्रिस्टायलमा आफ्नो ब्यक्तिगत समयमा सुधार गर्दै २ मिनेट १२.४६ सेकेन्डमा दुरी पार गरेकी छिन् । यसअघि डुवानको ब्यक्तिगत समय २ मिनेट १५.०१ समय रहेको थियो । यस विधामा गौरिकाको नाममा २ मिनेट ११.९४ सेकेन्डको कीर्तिमान छ ।

अब नेपाली खेलाडीहरुको दुई खेल बाँकी छ । बिहिबार डुवाना लामाले १०० मिटर फ्रिस्टायल र एलेक्सले शुक्रबार ५० मिटर फ्रिस्टायलमा प्रतिस्पर्धा गर्नेछन् ।