काठमाडौं (हाम्रो खेलकुद) – ओलम्पियन जुडोकी फुपुल्हामु खत्रीलाई नेपाल जुडो संघले मंगलबार २५ हजार रुपैयाँबाट पुरस्कृत गरेको छ । रियो ओलम्पिक– २०१६मा फुपुले महिला ६३ केजीमुनि तौलसमूहमा प्रतिस्पर्धा गरेकी थिइन् । उनले एक बाउट पूरा समय (४ मिनेट) टिकेर खेलेकोमा फुपुलाई पुरस्कृत गरेको हो । फुपुलाई एक बाउट पूरा समय टिकेको खण्डमा २५ हजार रुपैयाँबाट पुरस्कृत गर्ने निर्णय गरेको थियो ।

ओलम्पिकको जुडोमा पूरा समय टिकेर खेल्ने फुपु पहिलो नेपाली जुडो खेलाडी हुन् । फुपुले क्युबाकी इस्पिनोसासंग पूरै अवधि टिकेर खेलेकी थिइन् । ओलम्पिकमा सहभागी हुने फुपु चौथो नेपाली जुडो खेलाडी हुन् । फुपुअघि ऋषिराम प्रधान, गंगाबहादुर डंगोल र देबु थापाले ओलम्पिकको विभिन्न संस्करणमा सहभागिता जनाएका थिए । रियो ओलम्पिकमा देबु प्रशिक्षकका रुपमा सहभागी भएकी थिइन् । देबुलाई १० हजार रुपैयाँबाट पुरस्कृत गरियो ।

राष्ट्रिय खेलकुद परिषद्का सदस्य–सचिव केशवकुमार विष्टले फुपुलाई उक्त रकम बराबरको चेक हस्तान्तरण गरे । सोही अवसरमा भारतको केरलामा गत सेप्टेम्बरमा भएको १० औं एसियाली क्याडेट तथा १७ औं एसियाली जुनियर जुडो प्रतियोगितामा पदक जित्ने दुई महिला खेलाडी, प्रशिक्षक र व्यवस्थापकलाई पनि पुरस्कृत गरिएको थियो । पुरस्कृत हुने खेलाडीमा फुपुसहित मनीता प्रधान श्रेष्ठ छन् । फुपुले जुनियर ६३ केजीमुनि तथा मनीताले क्याडेटतर्फ ५७ केजीमुनि कांस्य जितेका थिए । दुवैलाई समान १० हजार रुपैयाँ प्रदान गरिएको थियो । प्रशिक्षक रमेश मगर र देवीका खड्कालाई ४ हजार रुपैयाँ तथा व्यवस्थापक धर्मरत्न पाछै र गायत्री बस्नेत समान ३ हजार रुपैयाँ पुरस्कृत गरियो ।