एसियाडलाई स्क्वासबाट ६ खेलाडी छनोट

काठमाडौं (हाम्रो खेलकुद) – चीनको होङझावमा हुने १९औं एसियाली खेलकुदअन्तर्गत स्क्वासबाट ६ खेलाडी छनोट भएका छन् ।

महिला र पुरुषमा समान ३–३ गरी ६ खेलाडी छनोट गरिएको नेपाल स्क्वास राकेट्स संघले जनाएको छ । महिलामा राष्ट्रिय च्याम्पियन बिपना ब्लोनसँगै कृष्णा थापा र स्वस्थानी श्रेष्ठ छनोट हुन सफल भइन् । पुरुषमा राष्ट्रिय च्याम्पियन अमृत थापामगरसँगै अरहन्त केशर सिंह र अमिर ब्लोन छनोट हुन सफल भए ।

विपना र अमिर तथा कृष्णा र अमृत सहोदर दिदी भाई हुन् । विपना र अमृत गत असोज र कात्तिकमा सम्पन्न नवौं राष्ट्रिय खेलकुदमा आफ्नो विधाको एकलतर्फका च्याम्पियन हुन् । टोलीको प्रशिक्षकमा हिरा बहादुर थापा र व्यवस्थापकमा संघका अध्यक्ष किशोर महर्जन छन् ।

संघले राउन्ड रोविन लिगको आधारमा प्रतियोगिताको आयोजना गर्दै एसियाडलाई खेलाडी छनोट गरेका हुन् । १९औं एसियाली खेलकुद सेप्टेम्वर २३ देखि अक्टोवर ८ सम्म चीनमा आयोजना हुँदैछ । आगामी एसियाडमा नेपालले स्क्वासतर्फ एकल र टिम इभेन्टमा प्रतिस्पर्धा गर्नेछ ।