काठमाडौं (हाम्रो खेलकुद) – नेपाली पुरुष राष्ट्रिय भलिबल टोलीले किर्गिस्तानमा जारी काभा पुरुष भलिबल नेसन्स लिगको तेस्रो खेलमा आज (मंगलबार) बलियो इरानसँग खेल्दैछ ।

नेपाल र इरानबीचको खेल किर्गिस्तानको विस्केकस्थित चोलपोन एटिए कभर्डहलमा नेपाली समयअनुसार दिउँसो ३ः४५ बजेपछि शुरु हुनेछ । लगातार दोस्रो हार बेहोरेको नेपाल बलियो इरानलाई स्तब्ध पार्ने लक्ष्यमा कोर्टमा उत्रनेछ ।

नेपाल इरानबाट कम्तीमा पनि एक सेट जित्ने योजनामा हुनेछ । तर, बलियो इरानविरुद्ध सेट लिन नेपालको लागि सहज भने हुनेछैन । नेपाल पहिलो खेलमा मंगोलिया र दोस्रो खेलमा किर्गिस्तानसँग समान ३–० को सोझो सेटमा पराजित भएको थियो ।

टोलीसँग कप्तान हरि हजुर थापा, मान बहादुर श्रेष्ठ, हेमन्त बहादुर मल्ल, धन बहादुर भट्ट क्षेत्री, टेक राज अवस्थी, रविन चन्द, दुर्गा बहादुर खड्का, हरि अधिकारी, सफल विक, लोकेन्द्र गिरी, राजेन्द्र विष्ट र भीम गाहा छन् ।

यता, इरान नेपाललाई हराउँदै काभा पुरुष भलिबल नेसन्स लिगमा लगातार दोस्रो जितको खोजीमा हुनेछ । इरानले पहिलो खेलमा उज्वेकिस्तानमाथि ३–० को सोझो सेटमा जित निकालेको थियो ।

इरानसँगको खेलपछि नेपालले बिहीबार तुर्केमिनिस्तान, शुक्रबार किर्गिस्तानको अर्काे टोली तथा आइतबार उज्वेकिस्तानसँग अन्तिम खेल खेल्नेछ ।