काठमाडौं (हाम्रो खेलकुद) – नेपाल एथलेटिक्स संघले चीनको हाङ्जावमा आगामी सेप्टेम्वरदेखि हुने १९औं एसियाली खेलकुद र अर्काे महिना जुलाईमा थाइल्यान्डमा आयोजना हुन लागेको २४औं एसियन एथलेटिक्स च्याम्पियनसिपका लागि खेलाडी छनोट गरेका छन् ।

चीनको हाङ्जावमा आगामी सेप्टेम्वर २३ देखि अक्टोवर ८ सम्म हुने १९औं एसियाली खेलकुदका लागि संघले पुरुषतर्फ चार र महिलामा तीन खेलाडीसहित कुल सात खेलाडी छनोट गरेको हो ।

पुरुषतर्फ १० हजार मिटर दौडमा दीपक अधिकारी छनोट भएका छन् । म्याराथनमा राजन रोकाय, ४ सय र ८ सय मिटर दौडमा सोम बहादुर कुमाल र ५ हजार मिटर दौडमा गोपीचन्द्र पार्की छनोट भएका छन् ।

महिलामा म्याराथनको चुनौती पुष्पा भण्डारीले पस्कनेछिन् । ५ हजार मिटर दौडमा राजपुरा पछाई र १० हजार मिटर दौडमा सन्तोषी श्रेष्ठ छनोट हुन सफल भएका छन् ।

एसियन गेम्स अघि नेपाली एथलेटिक्स टोलीले थाइल्यान्डको बैंककमा १२ देखि १६ जुलाईसम्म हुने २४औं एसियन एथलेटिक्स च्याम्पियनसिपमा प्रतिस्पर्धा गर्नेछ । त्यसअघि लागि पनि संघले पुरुषतर्फ ५ र महिलामा २ गरी ७ खेलाडी छनोट गरेको छ ।

पुरुषतर्फको १ सय र २ सय मिटर दौडमा आयुष कुँवर र गोपीचन्द्र पार्की छनोट भएका छन् । १५ सय र ५ हजार मिटर दौडमा मुकेश बहादुर पाल छनोट भएका छन् ।

सोम बहादुर कुमालले ४ सय र ८ सय मिटर दौडमा चुनौती पेश गर्नेछन् । दीपक अधिकारीले १० हजार मिटर दौडमा प्रतिस्पर्धा गर्नेछ ।

महिलातर्फ ८ सय र १५ सय मिटर दौडमा फुलमती राना तथा ५ हजार मिटर दौडमा राजपुरा पछाईले नेपालको चुनौती पेश गर्नेछिन् ।