काठमाडौं (हाम्रो खेलकुद) – नेपाल बुद्धिचाल महासंघको आयोजनमा दोश्रो साक चेस च्याम्पियनसिप २०२३ भोलि जेठ ३० गतेबाट हुने भएको छ ।

असार ४ गते सम्म गोदावरीस्थित होटेल भ्यु भृकुटीमा पुर्ण आवासीय सुविधासहित हुने प्रतियोगितामा महिला र पुरुष गरि दुई स्वर्ण पदकका लागि दक्षिण एशियाका आयोजक नेपालसहित भारत, बंगलादेश, पाकिस्तान, मालदिभ्स, श्रीलंका, भुटान र अफगानिस्तानका १० महिला र १० पुरुष खेलाडीहरुले राउण्ड रोविनको आधारमा प्रतिस्पर्धा गर्नेछन् ।

च्याम्पियनसिपको पहिलो संस्करण बंगलादेशमा खुला प्रतिस्पर्धाको आधारमा भएको थियो । दक्षिण एशियाका प्रत्येक राष्ट्रबाट १ महिला र १ पुरुष खेलाडी, डिफेन्डिङ च्याम्पियन १ महिला र १ पुरुष तथा आयोजक नेपालबाट थप १ महिला र १ पुरुष खेलाडी गरि १०–१० खेलाडीहरुले स्वर्ण पदकका लागी प्रतिस्पर्धा गर्ने आयोजकले जनाएको छ ।

नेपालबाट पुरुष तर्फ बर्तमान च्याम्पियन फिडे मास्टर रुपेश जयसवाल र रनरअप सुरवीर लामा तथा महिलातर्फ राष्ट्रिय च्याम्पियन फिडे मास्टर सुजना लोहनी र रनरअप सुशीला गुरुङले प्रतिस्पर्धा गर्नेछन् ।

यस्तै अफगानिस्तानले च्याम्पियनसिपमा सहभागिता नजनाउने भए पश्चात साउथ एशियन चेस काउन्सिलका अध्यक्षको परामर्शमा थप एक–एक नेपाली खेलाडीले उक्त च्याम्पियनसिपमा सहभागिता जनाउन पाउने भएको अध्यक्ष बिदुर गौतमले पत्रकार सम्मेलनमा जानकारी गराए ।

पहिलो संस्करणका पुरुषतर्फका विजेता भारतीय ईन्टरनेशनल मास्टर नुवइरश शाह सेख र महिलातर्फ बंगलादेशकी वुमन ईन्टरनेशनल मास्टर सुल्तान सरमीन सिरिनले च्याम्पियनसिपमा प्रतिस्पर्धा गर्नेछन् । यस्तै ग्रान्डमास्टर सायनतन दासले पनि यस च्याम्पियनसिपमा प्रतिस्पर्धा गर्ने पत्रकार सम्मेलनमा जानकारी गराइयो ।

अनुमानित ४० लाखको बजेट रहेको च्याम्पियनसिपमा पुरुष तर्फ शिर्ष तीन स्थान प्राप्त गर्ने खेलाडीहरु प्रथमले नगद १ लाख ५० हजार, दोश्रोले १ लाख र तेश्रोले नगद ५० हजार प्राप्त गर्नेछन् भने महिला तर्फका विजयी खेलाडीले नगद १ लाख, दोश्रोले ६० हजार र तेश्रोले नगद ४० हजार प्राप्त गर्नेछन् ।