लमजुङ (हाम्रो खेलकुद) – लमजुङको राइनास नगरपालिकामा राइनास साइकल ट्रेल तथा पदमार्गको उद्घाटन गरिएको छ ।

राइनास नगरपालिकाका मेयर खड्ग बहादुर गुरुङले राइनास नगरपालिका वडा नम्वर ९ र वडा नम्वर १० मा रहेको झन्डै ८ किलोमिटरको राइनास साइकल ट्रेल तथा पदमार्गको उद्घाटन गरेका हुन् ।

राइनासको गौरवको योजना अन्तर्गत प्यारजुङ भन्ज्याङदेखि जोगी गुफा, साल्मेकोट, लामागाउँ, गोरखनाथ मन्दिर, कोकेगाउँ, घुरसापे, दरबारगढी, पात्लेपानी, राइनासकोट हुँदै सिद्ध गुफा भएर भक्तिपार्क मोहोरियाकोटसम्मको साइकल ट्रेल तथा पद मार्गको निर्माण कार्य सप्पन्न भएपछि उद्घाटन गरिएको हो ।

राइनास नगरपालिका ९ को १० लाख र वडा १० को ६ लाख रुपैयाँ गरी १६ लाख रुपैयाँ लागत र स्थानीयको १० प्रतिशत जनश्रमदानमा साइकल ट्रेल र पदमार्ग निर्माण गरिएको हो ।

उद्घाटनको अवसरमा २२ जना साइकलिस्टहरुले ८ किलोमिटर साइकल दौडाएका थिए । राइनास नगरपालिका वडा नम्बर ९ र १० ले आन्तरिक तथा बाह्य पर्यटन प्रवर्दधन गर्ने उद्देश्यले यो साइकल ट्रेल तथा पद मार्गको योजना सुचारु गरिएको हो।

मोटरबाटो सञ्चालन नहुँदा पहिले यो पदमार्गकै रुपमा स्थापित थियो । मोटरबाट सञ्चालनमा आएपछि यो पदमार्गमा खासै प्रयोग गरिएको थियो ।

यसले राइनासमा रहेको होमस्टेलाई समेत जोडेको छ । यो क्षेत्रबाट धौलागिरि हिमालदेखि माछापुच्छ्रे, अन्नपूर्ण, लमजुङ, मनास्लुलगायत दर्जन हिमशृंखला देख्न सकिन्छ । सूर्योदय र सूर्यास्तको रमणीय दृश्य पनि देख्न सकिन्छ ।

राइनास साइकल ट्रेल तथा पदमार्गको उद्घाटनको अवसरमा राइनास नगरपालिकाका प्रमुख प्रशासकिय अधिकृत गोकर्ण राज सुयलसँगै वडा नम्वर १० का अध्यक्ष लक्ष्मण गुरुङलगायत समाजसेवी, स्थानिय युवा क्लबहरुको उपस्थिति रहेको थियो ।