काठमाडौं (हाम्रो खेलकुद) – नेपाल एपिएफ क्लबका प्रिन्स दाहाल र त्रिभुवन आर्मी क्लबकी रशिला महर्जनले १६ औं राष्ट्रव्यापी कृष्णमोहन स्मृति खुुल्ला ब्याडमिन्टन प्रतियोगिताको उपाधि जितेका छन् ।

प्रिन्स पुरुष एकलमा तथा रशिला महिला एकलमा च्याम्पियन बनेका हुन् । पुरुष एकलमा च्याम्पियन बनेको प्रिन्सले पुरुष डबल्स र मिक्स डबल्सगरी तेहोरो उपाधि जित्न सफल भए । यस्तै रशिलाले महिला एकलसँगै महिला डबल्सगरी दोहोरो उपाधि जित्न सफल भइन् ।

सशस्त्र प्रहरी बल नेपालको मुख्यालय हल्चोक स्वयम्भुमा बिहीबार भएको पुरुष एकलको फाइन्लमा प्रिन्सले त्रिभुवन आर्मी क्लबका रुकेश महर्जनलाई २१–११ र २१–११ ले पराजित गरी उपाधी हात पारे ।

पुरुष डबल्समा नेपाल एपीएफ क्लबका प्रिन्स दाहाल र विजित थापा मगरको जोडीले नेपाल पुलिस क्लबका जीवन आचार्य र बिष्णु कटुवाललाई २१–१८ र २१–१३ ले पराजित गर्दै उपाधि जिते ।

महिला एकलमा आर्मीकी रशिला महर्जनले एपीएफकी जेसिका गुरुङलाई २१–१९, १५–२१ र २१–१७ ले पराजित गरी उपाधि जितिन् ।

महिला डबल्समा आर्मीकी रशिला महर्जन र अनुमाया राईको जोडीले एपीएफकी जेिशका गुरुङ र सुनैना मुखियाको जोडीलाई २१–१६ र २१–१२ ले पराजित गर्दै उपाधि जित्न सफल भइन् ।

मिक्स डबल्समा एपीएफका प्रिन्स दाहाल र जेसिका गुरुङको जोडीले आफ्नै क्लबका विजित थापा मगर र शोभा गौचनको जोडीलाई २३–२१ र २२–२० ले पराजित गरी उपाधि जित्न सफल भए ।

१९ बर्षमुनिको ब्वाइजमा एपीएफका क्षितिज खनालले आफ्नै क्लबका रोशन साउदलाई १३–२१, २१–१७ र २१–१८ ले पराजित गर्दै च्याम्पियन बने । यू–१२ ब्वाइजमा आर्मीका रिजन मगरले आफ्नै क्लबका सुदेश राजकोटीलाई २४–२२ र २१–१८ ले हराएर उपाधि जित्न सफल भए ।

५५ बर्षमाथिको भेट्रान्समा चितवनका बुद्धी चौधरी र धादिङका बिष्णुलाल श्रेष्ठको जोडी पहिलो भए । ४५ बर्षमाथिको भेट्रान्समा एपीएफका सञ्जय कपाली र अनिल थाम्सुङको जोडी पहिलो भए । ईन्टर गभरमेन्ट सर्भिस (सिनियर अधिकृत) तर्फको खेलमा नेपाल टेलिकमका सोभाखर भण्डारी र हरिकृष्ण शर्माको जोडी पहिलो भए । यो जोडीले एपीएफका धिरेन्द्र चन्द र सुधिर सुवेदीको जोडीलाई २२–२० र २१–१२ ले हराए ।

विजयी खेलाडीलाई उपप्रधान एवं गृहमन्त्री नारायणकाजी श्रेष्ठ, सशस्त्र प्रहरी महानिरीक्षक राजु अर्याल, नेपाल ओलम्पिक कमिटिका अध्यक्ष जीवनराम श्रेष्ठ, राष्ट्रिय खेलकुद परिषद (राखेप) का सदस्यसचिव टंक लाल घिसिङ र नेपाल ब्याडमिन्टन संघका अध्यक्ष रामजी बहादुर श्रेष्ठ लगायतले पुरस्कृत गरे ।

नेपाल एपीएफ क्लबको आयोजनामा २१ जेठबाट शुरु भएको प्रतियोगितामा पुरुष एकल, महिला एकल, पुरुष युगल, महिला युगल, यू–१२ ब्वाइज, यू–१९ ब्वाइज, भेट्रान्स युगल ४५ र ५५ वर्ष, मिक्स डबल्स र इन्टर गभरमेन्ट सर्भिस (सिनियर अधिकृत) गरी १० वटा इभेन्ट्समा प्रतिस्पर्धा भएको थियो ।