लमजुङ (हाम्रो खेलकुद) – लमजुङको सुन्दरबजार नगरपालिकामा ‘दोस्रो राष्ट्रव्यापी खुल्ला मिनी म्याराथन’ आयोजना हुने भएको छ ।

जिल्ला खेलकुद बिकास समिति लमजुङको आयोजनामा दोस्रो संस्करणको मिनि म्याराथन आगामी असार २ गते हुन लागेको जिल्ला खेलकुद विकास समितिका अध्यक्ष योग बहादुर गुरुङ (कालु) ले जानकारी गराए ।

‘मिनी म्याराथन’ बेसीसहर नगरपालिकाको सीमा उदिपुर गेटबाट सुन्दरबजार नगरपालिकाको भोटेओडार, बगैंचा, सिउँडीबार, सुन्दरबजार कृषि क्याम्पसको गेट, पाउँदीबाट सिउँडीबार हुँदै पुनः भोटेओडार र कृष्ण बगैंचामा पुगेर समापन हुनेछ ।

प्रतियोगिताको विजेताले ५५ हजार ५ सय ५० मेडल र प्रमाणपत्र प्राप्त गर्नेछ । दोस्रो हुनेले २५ हजार ५ सय ५० रुपैयाँ र तेस्रो हुनेले १५ हजार ५ सय ५० रुपैयाँ प्राप्त गर्नेछ । यस्तै सान्त्वना २ जनालाई जनही १० हजार ५ सय ५० रुपैयाँ प्रदान गरिने अध्यक्ष गुरुङले जानकारी दिए ।

प्रतियोगिता सम्पन्न गर्न करिव ५ लाख खर्च हुने आयोजकले जानकारी दिएको छ । प्रतियोगितामा सहभागी हुन देशभरका जुनसुकै ठाउँका जुनसुकै र उमेर समुहले सहभागिता जनाउन पाउनेछ ।

सहभागिताको लागि १ असारसम्म दर्ताको लागि समयसीमा तोकिएको छ । दर्ता निशुल्क हुनेछ । पहिलो संस्करणमा जुम्लाका दुर्गा बुढा मगरले उपाधि जितेका थिए ।