काठमाडौं (हाम्रो खेलकुद) – पर्वत फेरि युवा क्लबले प्रथम वडा अध्यक्ष कप खुल्ला फुटसल प्रतियोगिताको उपाधि जितेको छ ।

धनेश्वरस्थित द गेम फुटसल काेर्ट धनेश्वरमा बुधबार भएको फाइनलमा जाल्पा देवी युवा क्लबलाई ३–१ ले पराजित गर्दै पर्वत फेरिले उपाधि जित्न सफल भएको हो ।

उपाधिसँगै पर्वत फेरिले ४० हजार रुपैयाँ, शिल्ड मेडल र प्रमण पत्र प्राप्त गरेको छ । दोस्रो भएको जाल्पादेवीले २० हजार रुपैयाँ, शिल्ड मेडल र प्रमण पत्र प्राप्त गरेको छ ।

उपविजेता जाल्पा देवीका अनिल थापा प्रतियोगिताको सर्वाेत्कृष्ट खेलाडी घोषित भए । च्याम्पियन पर्वत फेरिका आशिष दंगाल उत्कृष्ट गोलरक्षक चुनिए । डेभिड उत्कृष्ट मिडफिल्डर तथा आयोजक सुर्यदर्शन युवा क्लबका राजेश नेपाली राइजिङ खेलाडी घोषित भए । उनीहरुले समान १५ सय रुपैयाँसहित ट्रफी, मेडल र प्रमाणपत्र प्राप्त गरेको छ ।

विजयी टोली तथा खेलाडीलाई टोखा नगरपालिका वडा नम्वर ८ का अध्यक्ष रमेश खत्री, अखिल नेपाल फुटबल संघका केन्द्रिय सदस्य मनिष जोशी, वडा सदस्य बिजय बानिया, बानियाटार युवा समाजका अध्यक्ष प्रबिन बानिया, धलमटार युवा क्लबका अध्यक्ष आशा काजी महर्जन र आयोजक सुर्य दर्शन युवा क्लब क्लबका अध्यक्ष गणेश न्यौपाने लगायतले पुरस्कृत गरे ।

समापन दौरान समाजसेवी उद्वव पाण्डे, उत्तम थापा, केदार पाठकसँगै विभिन्न संस्थाका पदाधिकारीहरुको उपस्थिति रहेको थियो ।

टोखा नगरपालिका वडा नम्बर ८ को आर्थिक सहयोग तथा सुर्य दर्शन युवा क्लबको आयोजनामा १६ र १७ जेठमा भएको प्रतियोगितामा २३ टोलीको सहभागिता रहेको थियो । टोलीले नकआउटका आधारमा प्रतिस्पर्धा गरेका थिए ।