काठमाडौं (हाम्रो खेलकुद) – यसअघिको दुई संस्करणको च्याम्पियन तथा घरेलु टोली नेपाल एनएससी काभा महिला भलिबल च्यालेन्ज कपको फाइनलमा पुग्न असफल भएको छ ।

एसियाको छैटौं वरीयताको काजकस्तानलाई बलियो चुनौती पेश गरेपनि नेपाल २–३ को सेटमा पराजित हुँदै नेपाल घरेलु मैदानमा नेपाल सेमिफाइनलबाटै बाहिरिन पुगेको हो ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको खेलमा पहिलो सेट गुमाएको नेपालले त्यसपछिको दुई सेट जित्दै खेललाई आफ्नो पकडमा पारेको थियो ।

तर, चौथो सेट गुमाएपछि खेल पाँचौं तथा निर्णायक सेटमा लम्बिन पुग्यो । निर्णायक तथा पाँचौ सेटमा पनि नेपालको प्रदर्शन फितलो रह्यो ।

प्रतिस्पर्धात्मक पहिलो सेट नेपालले २८–३० गुमाउन पुग्यो । सुरुवातदेखि नै पछि रहेको नेपालले एक समय १८–१५ ले अग्रता लिएपनि त्यो अग्रतालाई जोगाउन सकेन ।

दोस्रो सेटमा सुरुवातदेखि नै अग्रता लिदै नेपालले २५–१६ को एकपक्षीय जित निकाल्न सफल भयो । नेपालले दोस्रो सेटमा एक समय (१२–५) ७ अंकको अग्रता बनाएको नेपाललाई काजकस्तानले सेटमा १६–१३) ३ मो छोट्याएपनि त्यसपछि नेपालले सानदार प्रदर्शन गर्दै जित निकाल्न सफल भयो ।

तेस्रो सेटमा पनि नेपालले दोस्रो सेटकै प्रदर्शनलाई दोहो¥याउँदै २५–१५ को सहज जित निकाल्न सफल भयो । ५–१, ८–३, १२–९, १८–१२ र २४–१२ को अग्रता बनाउँदै नेपालले तेस्रो सहजै आफ्नो पक्षमा पार्यो । १८–१२ को स्थितिबाट नेपालले लगातार ६ अंक जोड्दै जित निकाल्न सफल भयो ।

चौथो सेटमा भने नेपालको प्रदर्शन फितलो रह्यो । सुरुवातदेखि नै पछि परेको नेपालले चौथो सेट १८–२५ ले गुमाउन पुग्यो । एक समय ६–१५ ले पछि रहेको नेपालले ११–२३ को स्थितिमा लगातार ६ अंक जोड्दै खेललाई १७–२३ को स्थितिमा ल्याएपनि हार टार्न सकेन । चौथो सेट गुमाउने भएपछि प्रशिक्षक यान डे ब्रान्टले उषा भण्डारी, सरस्वती चौधरी, साफिया पुनलाई विश्राम दिएको थियो ।

पाँचौ सेटमा पनि नेपालको प्रदर्शन फितलो रह्यो । सुरुवादेखि नै पछि परेको नेपालले खेलमा फर्कने प्रयास गरेपनि काजकस्तानलाई ७–१५ ले नजिता सुम्पदै सेमिफाइनलबाटै बाहिरियो ।

अब काजकस्तानले उपाधिका लागि भारतको सामना गर्नेछ । भारतले शुक्रबारै उज्वेकिस्तानलाई ३–० को सोझो सेटमा हराएर फाइनलमा स्थान बनाइसकेको छ । नेपालले भने तेस्रो स्थानको लागि उज्वेकिस्तानसँग खेल्नेछ । फाइनल र तेस्रो स्थानको खेल आइतबार हुनेछ ।

नेपालले यसअघि सहभागिता जनाएको प्रतियोगितामा भारत र काजकस्तानको भने सहभागिता रहेको थिएन ।