काठमाडौं (हाम्रो खेलकुद) – १३औं दक्षिण एशियाली खेलकुद (साग) की स्वर्णपदक विजेता तेक्वान्दो खेलाडी काजल श्रेष्ठलाई नगद २ लाख प्रदान गरिएको छ ।

सिन्धुपाल्चोक जिल्ला लिसंखुपाखर गाउँपालिकाका अध्यक्ष एवम् खेलकुद प्रेमी राजु लामाले गाउँपालिकाको तर्फबाट बुधबार नेपाल तेक्वान्दो संघको केन्द्रीय कार्यालयमा काजल श्रेष्ठलाई उक्त रकम बराबरको चेक हस्तान्तरण गरे ।

सोही अवसरमा सिन्धुपाल्चोक जिल्ला तेक्वान्दो संघका अध्यक्ष प्रेम भण्डारीले काजल श्रेष्ठलाई नगद १५ हजार रुपैयाँ सहयोग गरे । उक्त अवसरमा अध्यक्ष लामाले खेलाडीहरुलाई हौसला प्रदान गर्ने मनसायले सो रकम सहयोग गरेको बताए ।

नेपाल तेक्वान्दो संघका महासचिव दीपराज गुरुङले सहयोगका लागि धन्यवाद व्यक्त गर्दै स्थानीय निकायबाट नै स्वयम् जनप्रतिनिधिहरु उपस्थित भई यसप्रकारको सहयोग गर्दा खेलाडीहरुको हौसला बढाउन र खेल क्षेत्र र खेलाडीहरुको उत्साह र प्रोतसाहनका लागि अनुरोध गरे ।

सिन्धुपाल्चोक जिल्लामा जन्मेर तेक्वान्दो खेललाई अंगाल्दैआईरहेकी राष्ट्रिय खेलाडी काजलले राष्ट्रिय तथा अन्तराष्ट्रिय प्रतियोगिताहरुमा आफ्नो उत्कृष्ट प्रदर्शन र उपलब्धी हासिल गर्दै आईरहेकी छिन् ।

उनी १५ देखि २१ जेठसम्म अजरवैजानको बाकु शहरमा आयोजना हुने बाकु वल्ड तेक्वान्दो च्याम्पियनसिपमा नेपालको तर्फबाट सहभागिता हुन बिहीबार अजरवैजान प्रस्थान गर्दैछिन् ।

यस्तै अजरवैजानको बाकु शहरमा हुने बाकु २०२३ वल्र्ड तेक्वान्दो प्रतियोगितामा सहभागी हुन जाने नेपाली राष्ट्रिय तेक्वान्दो टिमलाई बिदाई गरिएको छ ।

युवा तथा खेलकुद मन्त्री डिग बहादुर लिम्बुले सहभागी हुने टिमका खेलाडी तथा प्रशिक्षकलाई शुभकामनाका साथ बिदाई गरे । सहभागी हुने नेपाली राष्ट्रिय तेक्वान्दो टिमका खेलाडीहरु पुरुषतर्फ वीर बहादुर महरा (६८ केजी), निरज देउवा (८७ केजी), गोविन्द बहादुर आले (६३ केजी) र सुमित विष्ट (५४ केजी) रहेका छन् ।

महिलातर्फ इन्दिरा बस्नेत (६७ केजी), आयशा लामा (५३ केजी) काजल श्रेष्ठ (४९ केजी) र युनिशा राई (४६ केजी) छिन् । प्रशिक्षकमा बब्लु शिवाकोटी र निशा रावल छिन् ।

विदाई कार्यक्रममा नेपाल तेक्वान्दो संघका अध्यक्ष प्रकाश शम्शेर राणा, उपाध्यक्ष भान बहादुर चन्द, महासचिब दिपराज गुरुङ र केन्द्रीय सदस्य कुमार लामा घिसिङलगायत उपस्थिति रहेको थियो ।