ललितपुर (हाम्रो खेलकुद) – विभागीय टोलीद्धय नेपाल एपिएफ क्लब र त्रिभुवन आर्मी क्लबले मेयर कप खुल्ला महिला तथा पुरुष भलिबल प्रतियोगिताको महिलातर्फ विजयी सुरुआत गरेका छन् ।

ललितपुरको जावलाखेलस्थित जावलाखेल भलिबल प्रशिक्षण केन्द्रको कभर्डहलमा आइतबार एपीएफले आयोजक ललितपुर महानगरपालिकालाई ३–० को सेटमा हराएर सुखद सुरुआत गरेको हो ।

एपीएफले ललितपुरमाथि २५–६, २५–७ र २५–१४ को सोझो सेटमा जित निकाल्यो । यस्तै महिलातर्फको अर्काे खेलमा आर्मीले कोटेश्वर बहुमुखी क्याम्पसलाई २५–६, २५–४ र २५–५ को सेटमा जित निकाल्यो ।

पुरुषतर्फ ललितपुर महानगरपालिका र नेपाल गणतान्त्रिक खेलकुदले जित निकालेका छन् । ललितपुरले बोगटी समाज ललितपुरलाई २५–२०, २५–१८ र २५–१९ ले हराउँदा गणतान्त्रिकले पाटन बहुमुखी क्याम्पसलाई २५–१२, २५–२० र २५–१५ ले हराउन सफल भयो ।

प्रतियोगितामा सोमबार पुरुष र महिलामा समान दुई खेलमा प्रतिस्पर्धा हुनेछ । ललितपुर महानगरपालिकाको आयोजना र जावलाखेल भलिबल प्रशिक्षण केन्द्रको ब्यवस्थापन रहेको १६ बैशाखसम्म चल्ने प्रतियोगितामा पुरुषतर्फ ८ र महिलामा ७ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ ।

लिगकम नकआउटका आधारमा हुने प्रतियोगिताको शीर्ष दुई टोली सेमिफाइनलमा पुग्नेछन् । विजेताले समान २ लाख, उपविजेताले १ लाख र तेस्रो हुनेले ५० हजार रुपैयाँ पुरस्कार प्राप्त गर्नेछन् । सर्वोत्कृष्ट खेलाडीलाई जनही १० हजार र विधागततर्फको उत्कृष्ट खेलाडीलाई जनही ५ हजार रुपैयाँ दिईने आयोजकले जनाएको छ ।