काठमाडौं (हाम्रो खेलकुद) – ललितपुर महानगरपालिकाको आयोजनामा शनिबारेदखि जावलाखेलमा मेयर कप खुल्ला महिला तथा पुरुष भलिबल प्रतियोगिता शुरु हुँदैछ ।

जावलाखेलस्थित जावलाखेल भलिबल प्रशिक्षण केन्द्रको कभर्डहलमा ९ देखि १६ बैशाखसम्म चल्ने प्रतियोगितमा पुरुषतर्फ ८ र महिलामा ७ टोलीको सहभागिता रहेको जावलाखेल भलिबल प्रशिक्षण केन्द्रले जनाएको छ ।

प्रतियोगिताको उद्घाटन शनिबार दिउँसो १ बजे ललितपुर महानगरपालिकाका प्रमुख चिरीबाबु महर्जनले गर्नेछन् । उद्घाटन १ बजे हुने भनिएपनि खेलहरु बिहानदेखि नै सुरु हुनेछ ।

लिगकम नकआउटका आधारमा हुने प्रतियोगितामा पुरुष र महिला दुवै तर्फका सहभागी टोलीलाई दुई समूहमा विभाजन गरिएको छ ।

पुरुषतर्फ समूह ‘ए’ मा त्रिभुवन आर्मी क्लब, ललितपुर महानगरपालिका, बोगटी समान ललितपुर तथा सुर्य विनायक युथ क्लब रहेक ाछन् । समूह ‘बी’ मा नेपाल एपिएफ क्लब, नेपाल पुलिस क्लब, पाटन बहुमुखी क्याम्पस र नेपाल गणतान्त्रिक खेलकुद रहेका छन् ।

महिलाको समूह ‘ए’ मा नेपाल पुलिस क्लब, त्रिभुवन आर्मी क्लब र कोटेश्वर बहुमुखी क्याम्पस तथा समूह ‘बी’ मा न्यु डायमण्ड युथ स्पोर्ट्स क्लब, नेपाल एपिएफ क्लब, ललितपुर महानगरपालिका र परोपकार गल्स होस्टेल रहेका छन् । हरेक समूहका शीर्ष दुई टोली सेमिफाइनलमा पुग्नेछ ।

उपाधि विजेता टोलीले समान २ लाख, उपविजेताले १ लाख र तेस्रो हुनेले ५० हजार रुपैयाँ पुरस्कार प्राप्त गर्नेछन् । सर्वोत्कृष्ट खेलाडीलाई जनही १० हजार र विधागततर्फको उत्कृष्ट खेलाडीलाई जनही ५ हजार रुपैयाँ दिईने आयोजकले जनाएको छ ।