काठमाडौं (हाम्रो खेलकुद) – सूर्य नेपाल गल्फ टुर २०२२–२३ अन्तर्गत सातौं प्रतियोगिता सूर्य नेपाल एनपीजीए टुर च्याम्पियनसिपको तेस्रो दिन नेपाल नम्बर एक गल्फर सुबास तामाङ २ स्ट्रोकको अग्रता सहित शीर्षस्थानमा उक्लिएका छन् ।

गोकर्ण गल्फ क्लबमा दक्षिण एसियाली खेलकुदका दोहोरो स्वर्ण विजेता सुबासले बुधबार ३–अन्डर ६९ को कार्ड बनाउँदै समग्रमा १०–अन्डर २ सय ६ सहित पहिलो दुई दिनका लिडर सञ्जय लामालाई २ स्ट्रोकले पछि पारे ।

सञ्जयले इभन–पार ७२ मा खेल सकाए । समग्रमा ८–अन्डर २ सय ८ को स्कोरमा उनी दोस्रो स्थानमा झरे । पहिलो दिनका एकल लिडर सञ्जयले दोस्रो दिन भने एमरच्योर सदभावसँग शीर्षस्थान बाँडेका थिए । अन्तिम १८ होलको खेल बाँकी रहँदा यो पटक पनि एमेच्योर खेलाडीले प्रोफेसनल गल्फरलाई कडा चुनौती दिएका छन् ।

४–अन्डर ६८ को उत्कृष्ट नतिजा सहित समग्रमा ६–अन्डर २ सय १० को स्कोरमा रबि खड्का तेस्रो स्थानमा उक्लिए । लयमा फर्किएका भुवन नगरकोटीले तेश्रो दिन पनि ४–अन्डर ६८ मा खेल सकाए । लगातार दुई दिन ४–अन्डर खेलेका उनी समग्रमा ५–अन्डर २ सय ११ को स्कोरमा चौथो स्थानमा उक्लिए । दो

स्रो दिन सानदार प्रदर्शन सहित सञ्जयसँग शीर्षस्थान बाँडेका एमरच्योर सदभाव आचार्यले आज ४–ओभर ७६ को खराब प्रदर्शन गरे । समग्रमा ४–अन्डर २१२ सहित उनी पाँचौ स्थानमा झरे ।

समग्रमा २–अन्डर २ सय १४ स्कोर गर्दै छैटौं स्थानमा रहने क्रममा नीरज तामाङले आज १–ओभर ७३ मा खेल सकाए । १–ओभर ७३ खेल्दै समग्रमा १–ओभर २ सय १७ को स्कोरमा कमल तामाङ सातौं स्थानमा छन् ।

समग्रमा २–ओभर २ सय १८ सहित जयराम श्रेष्ठ र रमेश अधिकारीले संयुक्त रुपमा आठौं स्थानमा छ जयरामले ३–अन्डर ६९ र रमेशले इभन–पार ७२ मा खेल सकाए ।

एमेच्योर टासी छिरिङ र प्रो भुबहादुर गुरूङ समग्रमा ३–ओभर २ सय १९ को स्कोरमा संयुक्तरुपमा दशौं स्थानमा रहेका छन् । टासीले ४–अन्डर ६८ र भुबहादुरले २–ओभर ७४ को कार्ड बनाए ।

लगातार तेस्रो दिन पनि अन्डर पारको स्कोर निकाल्ने क्रममा सुबाशले फ्रन्ट नाइन १–अन्डर ३५ मा सकाए । दिनको सुरुवात बर्डीबाट गरे पनि दोस्रो र चौथौं होलमा एक–एक सट खेर फाले ।

यसपछि छैटौं र सातौं होलमा बर्डीको सफलता प्राप्त गरे। ब्याक नाइन २–अन्डर ३४ मा सकाउने क्रममा सुबाशले १०औं, १२औं र १८औं होलमा एक–एक सट बचाए र १६औं होलमा बोगी खेपे ।

सञ्जयले खराब सुरुवात गरे । दोस्रो, चौथो र छैटौ होलमा बोगीको सामना गर्दै फ्रन्ट नाइन ३–ओभर ३९ मा सकाउन बाध्य भए । तर ब्याक नाइनमा सम्हालिदै ३–अन्डर ३३ को स्कोर निकाले। ११औं, १२औं, १५औं र १७औं होलमा बर्डीको सफलता प्राप्त गरे भने १८औं होलमा एक सट खेर फाले ।

रबिले फ्रन्ट नाइनमा उत्कृष्ट प्रदर्शन गर्दै ५–अन्डर ३१ को स्कोर गरे । पहिलो, दोस्रो, तेस्रो र छैटौ होलमा बर्डी प्रहार गरे भने चौथो होलमा एक सट खेर फाले । उनले तीन पारको आठौं होलमा होल इन वानको सफलता प्राप्त गरे । ब्याक नाइन भने १–ओभर ३७ मा पुरा गरे । १३औं र १४औं होलमा बोगीको सामना गर्दा १५औं होलमा एक सट बचाए ।

७२ होलको प्रतियोगितामा ३१ प्रोफेसनल र ९ एमेच्योर खेलाडीले प्रतिस्पर्धा गरिरहेका छन् । कुल ८ लाख नगद पुरस्कार राशीको प्रतियोगिताको विजेताले उपाधिसँगै १ लाख ४० हजार प्राप्त गर्नेछ। दोस्रो हुनेले ९० हजार र तेस्रो हुनेले ६७ हजार प्राप्त गर्नेछन् । उत्कृष्ट २१ भित्र पर्ने अन्य प्रोफेसनल खेलाडीले पनि नगद पुरस्कार प्राप्त गर्नेछन् ।