काठमाडौं (हाम्रो खेलकुद) – विभागीय टोली नेपाल एपीएफ क्लब प्रथम पोष्टबहादुर बोगटी स्मृति कप राष्ट्रिय पुरुष भलिबल प्रतियोगिताको सेमिफाइनलमा प्रवेश गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको समूह चरणको अन्तिम खेलमा एपीएफले सुदूरपश्चिम प्रदेशलाई ३–१ को सेटमा पराजित गर्दै एपिएफ समूह ‘ख’ को उपविजेता बन्दै अन्तिम चारमा पुग्न सफल भएको हो ।

पहिलो सेट २३–२५ ले गुमाएको एपिएफले त्यसपछिको तीनै सेट २५–१८, २५–१२ र २५–२१ ले आफ्नो पक्षमा पार्दै जित निकाल्न सफल भयो । एपिएफको जितसँगै प्रतियोगिताको सेमिफाइनल समिकरण पूरा भएको छ । सुदूर पश्चिम भने दुई खेलमै हार बेहोर्दै प्रतियोगिताबाट बाहिरिएको छ ।

यसअघि नेपाल आर्मी र नेपाल पुलिस क्लब समूह विजेता तथा गण्डकी प्रदेश समूह उपविजेताको रुपमा सेमिफाइनलमा पुगिसकेको छ । अब पहिलो सेमिफाइनलमा एपीएफ र आर्मीबीच तथा दोस्रो सेमिफाइनल पुलिस र गण्डकीबीच खेल हुनेछ । दुवै सेमिफाइनल शुक्रबार हुनेछ ।

पाँच दिनसम्म लिगकम नकआउटको आधारमा सञ्चालन हुन प्रतियोगिताको विजेताले चार लाख, उपविजेताले दुई लाख, तेस्रो हुने टोलीले एक लाख रुपैयाँ र सन्त्वना पुरस्कार ५० हजार रुपियाँ पाउनेछ ।

विधागत उत्कृष्ट खेलाडी र प्रशिक्षकलाई जनही १० हजार र सर्वोत्कृष्ट खेलाडीले १५ हजार रुपियाँ प्रदान गरिने आयोजकले जनाएको छ । पोष्टबहादुर बोगटीको सम्झनामा आयोजित भलिबल प्रतियोगितामा तीन विभागीय, गण्डकी र सुदूरपश्चिम प्रदेशको सहभागिता रहेको छ ।