हिमाल खरेल, बिर्तामोड

राजन सुवेदी झापा जिल्लास्तरीय खुला तथा आमन्त्रित रेटिङ बुद्धिचाल प्रतियोगिताको उपाधि जितेका छन् । झापाको काँकरभिट्टामा तीन दिनसम्म भएको प्रतियोगितामा राजनले उपाधि चुमेका हुन् । उपाधिसँगै राजनले २५ हजार रुपैयाँ प्राप्त गरे ।

मोरङ र सुनसरीका खेलाडीलाई समेत सहभागिता गराइएको प्रतियोगितामा प्रकाशचन्द्र नेपाल दोस्रो भए । विकास मैनाली तेस्रो र रिसोन थापा चौथो भए । प्रकाशलाई १५ हजार, विकासलाई १३ हजार र रिसोनेलाई १० हजार रुपैयाँ प्रदान गरिएको छ ।

प्रतियोगिताका पाँचौँ हिमाल राईलले ७ हजार ५ सय, छैटौँ विश्वविजय घिमिरेले ६ हजार, सातौँ विक्रम राईले ५ हजार, आठौँ राज लिम्बूले ४ हजार तथा नवौँ बलबहादुर तामाङ र दशौँ उमेश राईले समान ३ हजार रुपैयाँ प्राप्त गरे ।

प्रतियोगिताअन्तर्गत अनरेटेड, भेट्रान्स, मेचीनगर, महिला र पुरुष विधामा प्रथम हुनेलाई समान ३ हजार रुपैयाँ प्रदान गरिएको प्रतियोगिता निर्देशक भरत गुरुङले जानकारी दिए ।

प्रतियोगिताको आयोजना रोटरी क्लब अफ मेचीनगर, नाइट चेस क्लब र मेची युमा चेस एकाडेमीले संयुक्त रुपमा गरेको हो । प्रतियोगितामा झापाका विभिन्न पालिका, मोरङ र सुनसरीबाट १२ वर्षदेखि ७२ वर्षसम्मका ३६ जना खेलाडीले सहभागिता जनाएका थिए ।

विजेतालाई मेचीनगर नगरप्रमुख गोपालचन्द्र बुढाथोकी, नेपाल बुद्धिचाल संघ कोशी प्रदेश अध्यक्ष सुरेन्द्र राई, रोटरी क्लब अफ मेचीनगरका अध्यक्ष अनन्तप्रकाश वस्ती, निवर्तमान अध्यक्ष किशोर (कपिल) क्षेत्री, नाइट चेस क्लब मेचीनगरका अध्यक्ष राजु कार्कीलगायतले पुरस्कार वितरण गरे ।