विराटनगर (हाम्रो खेलकुद) – गिरिजाप्रसाद कोइराला स्मृति चौथो राष्ट्रिय पुरुष हक्की प्रतियोगितामा त्रिभुवन आर्मी क्लब र नेपाल पुलिस क्लब विजयी भएका छन् ।

बिहीबार विराटनगरको सहिद रंगशालामा भएको खेलमा आर्मीले कर्णाली प्रदेशलाई १३–० फराकिलो अन्तरले पराजित गरेको हो । आर्मीका रोमन रानाले ६, प्रदीप राजवंशीले ३, अमरबहादुर गुरुङले २ गोल, रंजित राउत, देवसिंह धामीले समान १ गोल गरे । आर्मीका रोमन राना म्यान अफ द म्याच भए ।

पुलिसले गण्डकी प्रदेशलाई ८–० ले पराजित गरेको छ । पुलिसका लागि महेश धामीले ५, आयुष साह, केशव जोशी र रोहित लामाले समान १ गोल गरे । महेश धामी म्यान अफ द म्याच भए ।

कोशी र मधेस प्रदेशले २–२ गोलको बराबरी खेल्दै अंक बाँडेका छन् । कोशीका विसु घिमिरे र मनोज चौधरीले गोल गर्दा मधेसका पंकज दाहाल र राहुल साहले गोल गरे । कोशीका मनोज चौधरी प्लेयर अफ द म्याच भए ।

यस नतिजासँगै आर्मी दुई खेलमा ६ अंक जोडेर शीर्षस्थानमा छ । पुलिसले एक खेलबाट ३ अंक जोडेको छ । कोशी र मधेसले समान १ अंक जोडेका छन् ।

चैत २७ गतेसम्म हुने प्रतियोगितामा नेपाल आर्मी, नेपाल पुसिल, कोशी प्रदेश, मधेस प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशको सहभागिता छ । प्रतियोगिताको विजेताले ७५ हजार, उपविजेताले ४१ हजार र तेस्रो हुने टोलीले २५ हजार रुपैयाँ प्राप्त गर्ने छन् ।

प्रतियोगिताअन्तर्गत शुक्रबार पहिलो खेल सुदूरपश्चिम प्रदेश र कोसी प्रदेश, दोस्रो खेल नेपाल आर्मी र गण्डकी प्रदेश तथा तेस्रो खेल नेपाल पुलिस र कर्णाली प्रदेशबीच प्रतिस्पर्धा हुनेछ ।