काठमाडौं (हाम्रो खेलकुद) – फरवार्ड विमल घर्ती मगरले इन्ज्युरी समयमा गोल गरेपछि सहिद स्मारक ए डिभिजन लिगको साविक विजेता मच्छिन्द्र हिमालयन शेर्पा क्लबसँग हारबाट जोगिएको छ । विहीबार सातदोबाटोस्थित एन्फा कम्प्लेक्समा खेल १-१ को बराबरीमा सकिएको हो ।

भुटानी फरवार्ड चेन्चो ग्याल्सेनले डेब्यु गरेको खेलमा मच्छिन्द्रले गोल गर्न सकेनन् । नाइजेरियन फरवार्ड ओलावाले अफिजसँगै अभिषेक गुरुङ आक्रमणमा खेल्दा विमल घर्ती मगर मिडफिल्डमा खेलेका थिए । तर शेर्पाको डिफेन्सले एकपछि अर्को आक्रमण रोक्दै अन्तिम समयमा सत्यम शर्माको पेनाल्टीमा अग्रता लियो । विमलले इन्ज्युरी समयमा गोल गर्दै हारबाट जोगाए ।

२८ औं मिनेटमा विमलले पेनाल्टी क्षेत्र बाहिरबाट गरेको प्रहार गोलरक्षक किशोर गिरिली डाइभ दिंदै बचाए । ३९ औं मिनेटमा चेन्चो ग्याल्सेनको पासमा ओलावाले आफिजको प्रहारमा किशोर नै बाधक बने । शेर्पाले भने पहिलो हाफमा डरलाग्दो आक्रमण बुन्न सकेको थिएन ।

७४ औं मिनेटमा सौरभ सुब्बाले पेनाल्टी क्षेत्र भित्र पाएको अवसर सदुपयोग गर्न सकेनन् । चेन्चोले दिएको कटब्याकमा डिफेन्स लाइन बिट भएपनि सौरभले ६ यार्ड बक्सनजिक सट लिन धेरै समय लगाएपछि उनको अन्तिम प्रहार डिफेन्डरले ब्लक गरे । लगत्तै कर्नरमा देवेन्द्र तामाङको हेडर भुँइमा लाग्दै पोस्ट माथिबाट गयो ।

८५ औं मिनेटमा शेर्पाले पेनाल्टीको अवसर पायो । पेनाल्टी क्षेत्रभित्र निशान लिम्बुले फ्लिक गर्ने प्रयास गरेको बल छिरिङ गुरुङको हातमा लागेपछि रेफ्री नविन्द्र महर्जनले पेनाल्टी दिए । पेनाल्टीमा सत्यम शर्माले गोलरक्षक विशाल श्रेष्ठलाई गलत दिशामा पठाउँदै अग्रता दिलाए ।

८९ औं मिनेटमा मच्छिन्द्रको बराबरी गर्ने प्रयासमा संजित राई बाधक बने । विजय भुजेलसँग गोलरक्षक किशोर गिरि पेनाल्टी क्षेत्र बाहिर ५०/५० बलमा जुधेपछि विजयले बल जित्दै पेनाल्टी क्षेत्र भित्र पुगे । उनको पहिलो सटलाई डिफेन्डर संजितले गोलतर्फ जानबाट रोक्दै अग्रता कायम राखे ।

इन्ज्युरी समयमा विमलले गोल गरे । छिरिङ गुरुङको क्रसमा शेर्पाको डिफेन्स र गोलरक्षक बिच तालमेल नमिल्दा विमलले रिबाउन्डलाई गोलमा परिणत गरे ।

यससँगै मच्छिन्द्र र शेर्पा दुवैको ६ खेलमा ६ अंक भएको छ । दुवै टोलीले १ जित, ३ बराबरी र २ हारको नतिजा निकालेका छन् ।