काठमाडौं (हाम्रो खेलकुद) – गण्डकी प्रदेशको पुरुष भलिबल टोली र नेपाल एपिएफ क्लब छैटौं ढोरपाटन पुरुष भलिबल च्याम्पियनसिपको फाइनलमा प्रवेश गरेको छ ।

गण्डकीले पुलिसलाई तथा एपिएफले आर्मीलाई पराजित गर्दै फाइनलमा भिडन्त पक्का गरेको हो । समूह विजेता बन्दै सेमिफाइनलकाे यात्रा तय गरेका आर्मी र पुलिस सेमिफाइनलमै पराजित हुन पुग्यो ।

नयाँ बसपार्कस्थित ढोरपाटन भलिबल प्रशिक्षण केन्द्रको मैदानमा मंगलबार भएको दोस्रो सेमिफाइनलमा गण्डकीले विभागीय टोली नेपाल पुलिस क्लबमाथि ३–२ को रोमाञ्चक र प्रतिस्पर्धात्मक जित निकाल्दै फाइनलमा एपिएफसँगको भेट पक्का गरेको हो ।

पहिलो र दोस्रो सेटमा २५–२१ र २५–१५ को सहज जित हात पारेको गण्डकीले त्यसपछिको दुई सेट २२–२५ र २०–२५ ले गुमाउँदा खेल पाँचौ सेटमा लम्बियो । पाँचौ तथा निर्णायक सेट गण्डकीले १५–९ ले जित्दै फाइनलमा स्थान बनाउन सफल भयो ।

म‌गलबारै भएको पहिलो सेमिफाइनलमा एपिएफले सुरुवाती सेट गुमाएपनि आर्मीलाई ३–१ को सेटमा पराजित गर्दै फाइनलमा स्थान पक्का ग¥यो । पहिलो सेट १८–२५ ले गुमाएको एपिएफले त्यसपछिको तीनै सेट २५–२२, २५–२२ र २५–२१ ले आफ्नो पक्षमा पार्दै फाइनलमा पुग्न सफल भयो ।

फाइनल बुधबार हुनेछ । च्याम्पियनसिपमा ११ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । च्याम्पियनसिपको विजेताले २ लाख ५० हजार, कप र मेडल प्राप्त गर्नेछ । दोस्रो हुनेले १ लाख २५ हजार, कप र मेडल प्राप्त गर्नेछ । तेस्रो हुनेले ६५ हजार, कप र मेडल प्राप्त गर्नेछ ।

च्याम्पियनसिपको सर्वाेत्कृष्ट खेलाडीले १० हजार रुपैया प्राप्त गर्नेछ । व्यक्तिगत विधातर्फ स्पाइकर, सेटर, ब्लकर, सर्भर, डिफेन्डर र प्रशिक्षकले समान ५ हजार रुपैयाँ प्राप्त गर्नेछ । प्रशिक्षण ट्रेनिङ गरेका प्रशिक्षकलाई मात्रै उत्कृष्ट प्रशिक्षक प्रदान गरिने आयोजकले जनाएको छ ।