चितवन (हाम्रो खेलकुद) – विभागीय नेपाल एपिएफ क्लबका सुरज राना मगर र काठमाडौंकी लक्ष्मी मगर दोश्रो प्रज्ञा स्मृति साईक्लिङ म्याराथन अन्तरगत इलाइटतर्फ पहिलो भएका छन् ।

निर्धारित ६५ किमि दुरी १ घण्टा ५४ मिनेट ३८ सेकेण्डमा पार गर्दै सुरजले उपाधी हात पारेका हुन् । आर्मीका सुरेश भुजेलले १ घण्टा ५४ मिनेट ३८.५२ सेकेण्डसहित दोस्रो भए ।

अमेरिकी नागरिक केलेभ हब ब्याण्ड तेस्रो तथा काभ्रेका अच्युत कृष्ण खरेल चौथा र आर्मीका हिमाल थनेतले क्रमश पाँचौ भए । उपाधीसँगै सुरजले ५० हजार रुपैयाँ शिल्ड र प्रमाणपत्र प्राप्त गरे । दोस्रो भएको सुरेशले ४० हजार तथा तेस्रो भएको केलेभले ३० हजार रुपैयाँ पाए ।

महिला इलाइटतर्फ काठमाडौँकी लक्ष्मी मगरले १ घण्टा ५७ मिनेट १७ सेकेण्डमा दुरी पार गर्दै पहिलो भइन् । प्युठानकी हुमी बुढा मगरले २ घण्टा ११ मिनेट ४५ सेकेण्ड निर्धारित दुरी पार गरि दोश्रो बनिन् । ईन्द्रकुमार तामाङ २ घण्टा २८ मिनेट ४४ सेकेण्डमा पादै तेश्रो भइन् ।

यस्तै पुरुष मास्टरतर्फ हर्क लामा पहिलो, विकास महर्जन दोस्रो तथा देव बहादुर बोहरा तेस्रो भए । पुरुष जुनियरतर्फ किरण लिम्बु पहिलो, अश्विन खत्री दोस्रो र सचिन सहनी तेस्रो भए । महिला जुनियरतर्फ विदिशा चौधरी पहिलो, साया थापा दोश्रो र निति गुरुङं तेस्रो भईन् ।

चितवन विशेषको पुरुषतर्फ प्रनित थापा प्रथम, रोनिश कर्मचार्य दोश्रो र सन्दिप श्रेष्ठ तेश्रो भए । महिलातर्फ मेरिना रानामगर पहिलो, जुना श्रेष्ठ दोश्रो र नीति गुरुङं तेश्रो भईन् ।

प्रतियोगितामा देशभरबाट ७० जनाको सहभागिता रहेको आयोजकले जनाएको छ । दिवङगत ज्ञानु दाहाल र प्रकाश दाहालको स्मृतिका स्थापना भएको प्रतिष्ठानले साईक्लिङ म्याराथनको आयोजना गर्दै आईरहेको छ ।

प्रतिष्ठानले आगामी वर्षबाट अन्य विधाका खेलकुद पनि थप गर्ने प्रतिष्ठानकी अध्यक्ष रेनु दाहाले जानकारी दिईन् । बागमती प्रदेशका मुख्यमन्त्री शालिग्राम जम्मरकट्टेलले प्रदेश सरकार खेलकुद विकासका नयाँ रणनीतिका समथ अगाडी बढेको स्पष्ट पारे ।

भरतपुर महानगरपालिका प्रमुख रेनु दाहालले विकासको रफ्तारमा अगाडि बढेको भरतपुरले खेलकुदको विकासमा समेत नयाँ फड्को मार्ने क्रममा रहेको बताईन् ।

यसैगरी प्रदेश खेलकुद विकास परिषद् वागमती प्रदेशका सदस्य सचिव सूर्यलाल भण्डारीले खेलकुदको विकास लागि वागमती प्रदेश मुलुकै अग्रणी भएको बताए ।