काठमाडौं (हाम्रो खेलकुद) – नेपाली बक्सिङको इतिहासमा ऐतिहासिक रजत पदक जित्न सफल युवा उदियमान बक्सर सुष्मा तामाङलाई पाख्रिन तामाङ समाजले सम्मान गरेको छ ।

पाख्रिन तामाङ समाजले शनिबार एक दिने बृहत् जनजाति कप ब्याडमिन्टन महोत्सवको दौरान उनलाई नगद १० हजार रुपैयाँ र सम्मान पत्रले सम्मानित गरेका हुन् । उनलाई पाख्रिन तामाङ समाजका अध्यक्ष शुक्र पाख्रिनले सम्मानपत्र प्रदान गरे ।

सुष्माले थाइल्यान्डको बैंककमा गत माघमा भएको एएसबीसी एसियन यू–२२ बक्सिङ च्याम्पियनसिपमा ऐतिहासिक रजत पदक जित्न सफल भएकी थिइन् । महिला ४५ देखि ४८ केजी तौल समूहमा सुष्मा फाइनलमा उज्वेकिस्तानकी फोजिलोभा फरजोनासँग अंकका आधारमा ५–० ले पराजित हुँदै रजतमा सीमित बनेकी थिइन् ।

एसियालीस्तरमा कुनैपनि उमेर समूहमा नेपाली बक्सिङ खेलाडीले रजत जितेको त्यो पहिलोपटक हो । यसअघि, एसियन गेम्समा नेपाली खेलाडीले कास्यपदक जितेका थिए ।

त्यसबेला सुष्माले पहिलो खेलमा भियतनाम र दोस्रो खेलमा मंगोलियाकी खेलाडीलाई पराजित गर्दै फाइनलमा पुगेकी थिइन् । उज्वेकिस्तानकी फोजिलोभा एसियन च्याम्पियन हुन् ।