काठमाडौं (हाम्रो खेलकुद) – नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) ले १७औं एनएनआइपिए स्पोर्ट्स अवार्डको तयारी पूरा भएको जनाएको छ ।

आयोजक एनएनआइपिएले बुधबार काठमाडौंमा पत्रकार सम्मेलनको आयोजना गर्दै सोमबार हुने अवार्डको सम्पूर्ण तयारी पूरा भएको जानकारी गराएको छ ।

एनएनआइपिएले वर्ष २०७८ मा राष्ट्रिय तथा अन्तर्राष्ट्रिय स्तरका अफिसियल खेलकुद प्रतियागिताहरु नभएको हुदा यसवर्ष नेपाल ओलम्पिक कमिटीबाट आधिकारिकता प्राप्त २७ खेलहरुलाई आधार मानी सम्बन्धित संघले सिफारिस गरिएका खेलाडीहरुलाई सम्मानित गर्ने जनाएको छ ।

विगत केही वर्षदेखि यो अवार्ड कार्यक्रम उपत्यकाको काठमाडौं, ललितपुर तथा भक्तपुरलगायतका विभिन्न ऐतिहासिक, सांस्कृितक सहरहरुमा आयोजना भइसकेकोमा यसपटक काठमाडौंको एलफ्ट होटेलमा हुने संघका महासचिव शिवसुन्दर गोथेले बताए ।

उनले यसपटक पनि अवार्ड ऐतिहासिक, सांस्कृितक सहरहरुमा आयोजना गर्ने तयारी गरिएपनि संघले प्रस्ताव लैजाने समयमा स्थानिय तह र त्यसपछि प्रतिनिधि सभाको निर्वाचन भएका कारण हुन नसकेको बताए ।

२७ खेलका उत्कृष्ट खेलाडीलाई १० हजार रुपैयाँ प्रदान गरिनेछ । २७ उत्कृष्ट खेलाडीमध्येबाट एक जना पुरुष र एक जना महिला खेलाडीलाई सर्वाेत्कृष्ट खेलाडी घोषण गरि समान १ लाख रुपैयाँ र सम्मानपत्र प्रदान गरिनेछ ।

त्यस्तै एक पुरुष र एक महिला प्रतिभाशाली खेलाडीलाई ५० हजार रुपैयाँ र सम्मानपत्र प्रदान गरिनेछ । एक जना पाका खेल व्यक्तिलाई गजराज आदर्श खेल व्यक्तित्वबाट सम्मानसँगै ३५ हजार रुपैयाँ प्रदान गरिनेछ ।

एक खेल पत्रकारलाई एनएनआइपिए खेल पत्रकारिता पुरस्कारबाट २५ हजार रुपैयाँ र सम्मानपत्रले सम्मानित गरिनेछ । एक जना पारा खेलाडीलाई वर्ष उत्कृष्ट पारा खेलाडी अवार्डसँगै १५ हजार रुपैयाँ प्रदान गरिनेछ ।

यसपटक फुटबल, एथलेटिक्स, ह्याण्डबल, गल्फ, उसु, भारोत्तोलन, सुटिङ, जुडो, ब्याडमिन्टन, आर्चरी, टेवल टेनिस, बक्सिङ, साइक्लिङ, फेन्सिङ, जिम्नास्टिक, हक्की, पौडी, ट्रायथलन, स्की, कुस्ती, बास्केटबल, कबड्डी, कराते, ¥याफ्टिङ एण्ड क्यानोइङ, भलिबल, तेक्वान्दो र लन टेनिसबाट समान एक जना खेलाडी सम्मानित हुनेछन् ।