काठमाडौं (हाम्रो खेलकुद) – सुर्य नेपाल गल्फ टुर २०२२–२३ अन्तर्गतको छैटौं प्रतियोगिता सुर्य नेपाल च्यालेन्ज मंगलबार (भोलि) देखि सुरु हुने भएको छ ।

प्रोफेसनल गल्फर एसोसियसनले सोमबार पत्रकार सम्मेलन गर्दै मंगलबारदेखि सुरु हुने सुर्य नेपाल च्यालेन्ज शुक्रबारसम्म रोयल नेपाल गल्फ क्लबमा संचालन हुने जनाएको छ ।

चार दिने प्रतियोगिता ७२ होलको हुनेछ । हरेक दिन १८ होलको खेल सञ्चालन हुनेछ । प्रतियोगितामा ३० प्रोफेसनल र ८ एमेच्योर गरि कुल ३८ खेलाडीले सहभागिता जनाउने छन् ।

प्रतियोगितामा साविक विजेता भुवन नगरकोटी, जयराम श्रेष्ठ, संजय लामा, रबि खड्का, रामे मगर, सुवास तामाङ, सद्भाव आचार्य लगायतका खेलाडीले सहभागिता जनाउने छन् । नेपालका नम्बर एक गल्फर शुक्र बहादुर राई भारतमा रहेका कारण प्रतियोगिता गुमाउनेछन् ।

रोयल नेपाल गल्फ क्लबको कोर्स राम्रो रहेका कारण यसपटक प्रतियोगितामा उच्च स्कोर हुने सम्भावना रहेको अध्यक्ष रविन्द्र मान श्रेष्ठले जानकारी दिए ।

५ लाख ४५ हजार पुरस्कार राशि रहेको प्रतियोगिताको विजेताले १ लाख रुपैयाँ प्राप्त गर्नेछन् । दोस्रो हुनेले ६५ हजार, तेस्रो हुनेले ४६ हजार, चौथो हुनेले ३८ हजार तथा पाँचौं हुनेले ३४ हजार रुपैयाँ प्राप्त गर्नेछन् ।

यस्तै छैटौंले ३० हजार, सातौंले २७ हजार, आठौंले २४ हजार, नवौंले २२ हजार, १०औंले २० हजार प्राप्त गर्नेछन् । शीर्ष २१ मा पर्नेले समेत नगद पुरस्कार प्राप्त गर्ने आयोजकले जनाएको छ ।