काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजको अन्तिम खेलमा युएईलाई ९ रनले डकवर्थ लेविस पद्धतिको आधारमा पराजित गर्दै सोझै विश्वकप छनोटमा स्थान बनायो । आइसिसी विश्वकप लिग–२ त्रिकोणात्मक ओडिआई सिरिजमा शीर्ष तीनमा पर्दै नेपालले आगमी जुन जुलाईमा सोझै जिम्बावेमा हुने विश्वकप छनोटमा स्थान बनाएको हो ।

जितको लागि ३ सय ११ रनको विशाल विजयी लक्ष्य पछ्याएको नेपाल पुरै समय दबाब जस्तैमा रह्यो । खेलको ४१ ओभर सम्म युएई डकवर्थ लेविस पद्धतिमा अघि रहँदै आएको थियो । युएईलाई अन्तिम ९ बलमा ७५ रन चाहिँएको थियो । डकवर्थ लेविसमा पनि युएई धेरै अघि थियो ।

४२ औं ओभरमा कप्तान मोहम्मद वासिम बलिङमा आएका थिए । त्यो ओभर पछि मात्रै नेपालले डकवर्थ लेविसमा अघि परेको थियो । वासिम ४२ औं ओभरमा आफैं बलिङमा आउने निर्णय लिए । चोभार एण्डबाट आएका मध्य गतिका बलर वासिमले पहिलो बल गुलशन झालाई डट राखे । दोस्रो बलमा दुई रन बटुले ।

त्यसपछि गुलशनले तेस्रो बलमा छक्का, चौथो, पाँचौं र छैटौं बलमा लगातार चौका प्रहार गर्दै कुल २० रन बटुले । त्यसपछि नेपाल डकवर्थ लेविस पद्धतिको आधारमा अघि रहेको थियो ।

जुनैद सिद्दिकको ४३ औं ओभरमा नेपालले ४३ रन बटुलेको थियो । ४४ ओभरमा जहुर खानले ८ रन खर्चेका थिए । खेल सकिन भन्दा दुई ओभर अघिको त्यो ओभर नै नेपालको जितको टर्निङ प्वाइन्ट बन्यो ।

स्पिनर आयन लाक्रा बलिङको लागि तयार भएका थिए । दीपेन्द्रसिंह ऐरी क्रिजमा ब्याटिङ गर्न लागेका थिए । आयनले पहिलो बल फ्याँल्नै लागेका थिए । त्यतिकैमा अम्पायर बुद्धि प्रधानले श्रीलंकन अम्पायर रविन्द्र विमालासिरीसँग छलफल गर्दै खेल सकिएको इसारा गरे ।

युएईका कप्तानले अम्पायरसँग प्रश्न गर्न थाले । तर नेपालका खेलाडी खुसी मनाउन थाले । पेभेलिएनमा बसेका नेपाली खेलाडीले आरिफ र गुलशनलाई अंगालो मार्न थाले । उता युएईका कप्तान मोहम्मद वासिम निरन्तर अम्पायरसँग छलफल गरेका थिए ।

कट अफ टाइम र ब्याड लाइट दुबैको कारण अम्पायरले खेल रोक्दै नेपाल डकवर्थ लेविस पद्धतिको आधारमा विजयी भएको घोषणा गरेका थिए । एकदिवसीय क्रिकेटमा डकवर्थ लेविस पद्धतिको आधारमा जान २० ओभर खेल हुनुपर्छ ।

४१ ओभर सम्म युएई डकवर्थ लेविसमा अघि रहि रह्यो । तर ४२ औं ओभरको त्यो २० रन जसले नेपाललाई सोझै विश्वकप छनोटमा पुर्याउन सफल भयो । गुलशन झा ४८ बलमा ४ चौका र २ छक्कासहित ५० रनमा क्रिजमा रहे । आरिफ शेख ५२, कुशल भुर्तेल ५० र भीम सार्की ६७ रनमा आउट भए ।

उता टियु क्रिकेट मैदानमा टस जितेर पहिला ब्याटिङ रोजेको युएईले निर्धारित ५० ओभरमा ६ विकेट गुमाउँदै ३ सय १० रन बनाएको थियो । युएईका उस्मान खानले ४२ बलमा ४ चौका र ११ छक्कासहित १ सय १ रनको शतकीय इनिङ खेलेपनि टोलीको हार टार्न सकेनन् । आसिफ नै खेलको प्लेयर अफ द म्याच चुनिए ।

आसिफले ४१ बलमा शतक हान्दै ओडिआई इतिहासकै सर्वाधिक चौथो छिटो कीर्तिमान कायम गरे । वृत्य अरविन्दले १ सय ३८ बलमा ८ चौका र २ छक्कासहित ९४ रनको योगदान दिएका थिए ।

नेपाल ३६ खेलमा १९ मा जित र १५ मा हारसहित ४० अंकका साथ तेस्रो स्थानमा रह्यो । नामिबिया ३६ खेलमा १९ जित र १६ मा हारसहित ३९ अंकका साथ चौथो स्थानमा रह्यो । आइसिसी विश्वकप लिग–२ बाट स्कटल्यान्ड च्याम्पियन, ओमान दोस्रो र नेपाल तेस्रो स्थानमा रहँदै सोझै विश्वकप छनोटमा पुगेका हुन् ।

जिम्बावेमा आगमी जुन जुलाईमा हुने छनोटमा कुल १० टोली हुन्छन् । विश्वकप छनोटमा सुपर लिग-२ का पुछारका पाँच टोली, लिग २ का शीर्ष तीन टोली नेपाल, ओमान र स्कटल्यान्ड र प्लेअफ क्वालिफायरमा शीर्ष दुई टोली गरि कुल १० टोली हुनेछन् ।

जिम्बावेमा हुने छनोटमा कुल १० टोलीलाई दुई समूहमा विभाजन गरिनेछ । जसबाट हरेक समूहबाट शीर्ष तीन तीन टोली सुपर सिक्समा स्थान बनाउछन् । सुपर सिक्समा एक अर्कासँग खेलेपछि शीर्ष दुईमा रहने टोली विश्वकपमा पुग्नेछन् । शीर्ष दुई टोलीले आगमी अक्टोबर नोभेम्बरमा भारतमा हुने एकदिवसीय विश्वकप खेल्न पाउनेछन् ।