काठमाडौं (हाम्रो खेलकुद) – नेपाल खेलकुद महासंघ अन्तरगत राष्ट्रिय जुडो संघ नेपाल र नेपाल जुडो संघको संयुक्त आयोजनामा राष्ट्रिय रेफ्रि सेमिनार, नेकोस तेस्रो भेट्रान्स जुडो प्रतियोगिता तथा नेकोस छैटाैं अन्तर्राष्ट्रिय जुडो प्रतियोगिता बुधबारदेखि आयोजना हुने भएको छ ।

आयोजकले मंगलबार राजधानीमा पत्रकार सम्मेलनको आयोजना गरि प्रतियोगितासँगै सेमिनार १ देखि ४ चैतसम्म एमएमएसी हल खुशिवी नयाँबजारमा हुने जानकारी गराएको छ । जस अनुसार १ र २ चैतमा रेफ्रि सेमिनार र ३ र ४ गते प्रतियोगिता हुनेछ ।

प्रतियोगिता दौरान नै रेफ्रीको परीक्षा हुने छ । रेफ्रि परीक्षामा उत्तिर्ण हुनेलाई राष्ट्रिय रेफ्रि लाइसेन्स प्रदान गरिनेछ ।
मंगलबादरदेखि नेकोस तेस्रो भेट्रान्स जुडो प्रतियोगिता हुनेछ । यस प्रतियोगितामा विजेता हुनेहरूलाई पदक तथा प्रमाणपत्र प्रदान गरिने छ ।

चैत्र ३ र ४ गते भुटान र जापानसहित १९ टिमले नेकोस–छैटौ“ अन्तर्राष्ट्रिय जुडो प्रतियोगिता हुनेछ । यस प्रतियोगितामा सब–क्याडेट (१५ वर्षभन्दा मुनि), क्याडेट (१५ वर्षदेखि १८ मुनि सम्मका) र जुनियर (१५ वर्षदेखि २१ मुनि सम्मका) गरी तीन तहमा विभाजन गरी खेलाइने छ ।

प्रतियोगितामा विजेता हुने तीनवटै तहका खेलाडीहरूई पदक तथा प्रमाणपत्र तथा प्रथम, दोस्रो र तेस्रो हुने टिमलाई ट्रफि र उत्कृष्ट महिला तथा पुरुष १ जना खेलाडीहरूलाई समेत ट्रफि प्रदान गरिने छ । यस प्रतियोगितामा प्रथम, द्वितीय र तृतीय हुनेहरूलाई जुनियरतर्फ क्रमशः राष्ट्रिय टिम ए, बी र सी टिमा बनाइनेछ ।

सब–क्याडेट पुरुषतर्फ –२०, –२४, –२७, –३०, –३४, –३८, –४२, –४६, –५०, –५५, –६०, ६० केजीमाथि र महिलातर्फ –२२, –२५, –२८, –३२, –३६, –४०, –४४, –४८, –५२, ५२ केजीमाथि हुनेछ ।

क्याडेट पुरुषतर्फ –५०, –५५, –६०, –६६, –७३, –८१, –९०, ९० केजीमाथि र महिलातर्फ –४०, –४४, –४८, –५२, –५७, –६३, –७०, ७० केजीमाथि केजीमा प्रतिस्पर्धा हुनेछ । जुनियर पुरुषतर्फ –६०, –६६, –७३, –८१, –९०, –१००, १०० केजीमाथि र महिलातर्फ –४८, –५२, –५७, –६३, –७०, –७८, ७८ केजीमा प्रतिस्पर्धा हुनेछ ।

प्रतियोगितामा महिला १०४ र पुरुष १४९ गरी जम्मा २५३ जना खेलाडीले सहभागी जनाउँदै छन् । यस प्रतियोगिताको अनुमानित बजेट १३ लाख ९५ हजार रुपैयाँ रहेको छ ।